شارپرێس:
لەگەڵ کۆتاییهاتنی قۆناغە مەیدانییەکانی سەرژمێریی گشتیی دانیشتوان لەعێراق، کێشەی نێوان هەولێرو بەغدا لەڕەهەندی سیاسییەوە گۆڕاوە بۆ ململانێیەکی تەکنیکیو ئاماریی ورد، ئەم پرۆسەیە کە دوای پەککەوتنی بۆ زیاتر لەسێ دەیەی ڕابردوو ئەنجامدرا، ئێستا لەژێر وردبینییەکی توندی لایەنە کوردییەکانە، بەتایبەتی دوای ئەوەی هۆشداریی درا لەوەی، هەر گۆڕانکارییەک لەداتاکاندا دەبێتە هۆی کەمکردنەوەی شایستە داراییەکانی هەرێمی کوردستان.
لەکاتێکدا عێراق لەقۆناغی یەکلاکردنەوەی داتاکانی سەرژمێریی گشتیی دانیشتوان نزیکدەبێتەوە، لایەنە کوردییەکان لەبەغدا نیگەرانییەکی قووڵیان هەیە لەئەگەری بەسیاسیکردنی ژمارەکان، ئەم پرۆسەیە کە لەتشرینی دوەمی 2024 ئەنجامدرا، ئێستا تەنها پرسێکی ئاماری نییە، بەڵکو گۆڕاوە بۆ کێشەیەکی چارەنوسساز کە ڕاستەوخۆ پەیوەستە بەمافە دەستورییو داراییەکانی هەرێمی کوردستانەوە.
دانەر عەبدولغەفار پەرلەمانتاری کورد لەپهرلهمانى عێراق لەڕاگەیەندراوێکدا هۆشدارییەکی توندی ئاراستەی وەزارەتی پلاندانانی فیدراڵی کردوەو جەختدەکاتەوە، ڕێژەی دانیشتوانی هەرێم 14٪ی کۆی گشتیی عێراق پێکدەهێنێتو هەر هەوڵێک بۆ کەمکردنەوەی ئەم ڕێژەیە وەک "یاریکردن بەداتاکان"و پێشێلکردنی مافی پێکهاتەکان دەبینرێت.
ئەو پەرلەمانتارە ئاماژەی بەوەشکردوە، هەر دەستکاریکردنێک، زیانێکی گەورە بەمیکانیزمەکانی دابەشکردنی دادپەروەرانەی سامان دەگەیەنێتو دەبێتە هۆی کەمکردنەوەی پشکی هەرێم لەبودجەی گشتیی، کە ئەمەش لای ئەوان وهكو پهرلهمانتارانى كورد هێڵی سورە.
ئەو نیگەرانییانە لەکاتێکدایە کە وەزارەتی پلاندانانی عێراقو دەستەی ئاماری فیدراڵی جهختدهكهنهوه لهسهرئهوهى، پرۆسەکە بهگوێرهى ستانداردە نێودەوڵەتییەکان بەڕێوەچوە، بەڵام نوێنەرانی کورد باس لەوەدەکەن، ئەوان بەوردی چاودێریی هەموو هەنگاوەکان دەکەنو ڕێگەنادەن مافە دەستورییەکانی هەرێم بکرێنە قوربانی ململانێ سیاسییەکان.
لایەنی کوردی ئامادەیی خۆی نیشانداوە کە لەئەگەری هەر لادانێک لەداتای ڕاستەقینە، هەموو ڕێکارە یاساییو دەستورییەکان بگرێتەبەر بۆ پاراستنی مافەکانی گەلی کوردستان.
ئەم ململانێیە ئاماژەیەکی ڕونە بۆ ئەوەی کە سەرژمێریی 2024 دەبێتە خاڵێکی وەرچەرخان لەپەیوەندییەکانی نێوان هەولێرو بەغدا؛ چونکە ئەنجامەکانی بۆ ساڵانی داهاتوو نەخشەی دابەشکردنی بودجە، کورسییەکانی پەرلەمانو پێگەی سیاسیی پێکهاتەکان لەناوخۆی عێراقدا دیاریدەکەن.
