شارپرێس:

لەوەرچەرخانێکی سیاسیی چاوەڕواننەکراودا، ئەمریکا بەفەرمی پشتیوانیی خۆی بۆ ڕێککەوتنی نێوان هێزەکانی سوریای دیموکرات (هەسەدە)و دەسەڵاتی دیمەشق ڕاگەیاند، ئەمەش وەک هەنگاوێکی ستراتیژیی بۆ کۆتاییهێنان بەدابەشکارییەکانی سوریا دەبینرێت.

وەزارەتی دەرەوەی ئەمریکا ڕایگه‌یاند، جێبەجێکردنی ڕێککەوتنی 29ی کانونی دوەمى ئه‌مساڵ، تەنها ڕێککەوتنێکی سەربازی نییە، بەڵکو کۆڵەکەیەکی سەرەکییە بۆ بونیادنانی دەوڵەتێکی سەقامگیر.

واشنتۆن داوای لەسەرجەم وڵاتانی ئەندام لەنەتەوەیەکگرتوەکان کردوه‌، بەدەم ئەم دەسپێشخەرییەوەبێن‌و هاوکاربن لەسەرخستنی پڕۆسەی تێکەڵکردنەوەی دامەزراوەکانی بەڕێوەبەریی خۆسەر لەناو دامەزراوەکانی دەوڵەتدا.

به‌گوێره‌ى ئه‌و زانیاریانه‌ى میدیاكانى ڕۆژئاواى كوردستان ئاشكرایانكردوه‌، ئەو ڕێککەوتنە نەخشەڕێگه‌یەکی نوێ بۆ باکورو ڕۆژهەڵاتی سوریا دەکێشێت کە گرنگترین خاڵەکانی بریتین له‌، پاشەکشەکردنی هێزە چەکدارەکان لەهێڵەکانی تەماس بۆ ڕێگریکردن لەهەر پێکدادانێک‌و گەڕانەوەی هێزەکانی ئاسایشی ناوخۆ بۆ ناو شارەکانی حەسەکەو قامیشلۆ لەژێر چەتری دەوڵەتدا له‌گه‌ڵ پێکهێنانی لیوا سەربازییه‌كانى تایبەت لەناو پێکهاتەی سوپای دەوڵەتدا کە هێزەکانی هەسەدە لەخۆدەگرێت، هه‌روه‌ها ئامادەکاریی بۆ ئەوەی سەرجەم دامەزراوە خزمەتگوزاریی‌و کارگێڕییەکانی ئیدارەی خۆسەر ببنەوە بەبەشێک لەسیستەمی فەرمی وڵات.

له‌و هه‌واڵه‌دا بۆچونى چاودێرانیش ئاماژه‌ى پێكراوه‌ كه‌ پێیانوایە، ئەو هەڵوێستەی ئەمریکا گڵۆپی سەوزە بۆ قۆناغێکی نوێ کە تێیدا (دیالۆگی سوری ـ سوری) جێگەی ململانێ چەکدارییەکان دەگرێتەوە.

هه‌روه‌ك باس له‌وه‌شكراوه‌، ئەو پاڵپشتییە نێودەوڵەتییە دەبێتە هۆی، کەمکردنەوەی مەترسییەکانی دەستێوەردانی دەرەکی‌و بەهێزکردنی سەروەریی خاکی سوریا‌و ڕەخساندنی زەمینە بۆ گەڕانەوەی ئاوارەکان‌و ئاوەدانکردنەوەى زیاترى سه‌رجه‌م ناوچه‌كانى سوریا به‌ڕۆژئاواى كوردستانیشه‌وه‌.

واشنتۆن کلیلی یەکگرتنەوەی ڕادەستی دیمەشق‌و هەسەدە کرد، بەڵام چاودێران ده‌پرسن، ئایا لایەنە هەرێمییەکان ڕێگەدەدەن ئەم نەخشە نوێیەی سوریا بەبێدەنگی جێگیربێت؟ یان ئەم ڕێککەوتنە دەبێتە سەرەتایەک بۆ ڕوبەڕوبونەوەیەکی جیاواز لەناوچەکەدا؟.