شارپرێس:
بەگوێرەی لێدوانی چاودێران، کۆریای باکوور بە سوودوەرگرتن لە سەرقاڵی ئەمریکا بە کێشەکانی ئێران و ڕۆژهەڵاتی ناوەڕاست، خێرایی بە بەرنامە سەربازیی و ئەتۆمییەکانی دەدات، بەشێوەیەک لە دوای 28ی شوباتەوە، پیۆنگیانگ 5 تاقیکردنەوەی مووشەکی ئەنجامداوە، کە 4 دانەیان لە مانگی نیساندابووە و ئەمەش بەرزترین ڕێژەیە لە مانگی کانوونی دووەمی 2024ەوە.

 
بە بڕوای شرۆڤەکاران، ئەم تاقیکردنەوانە نیشاندەری هەوڵی کۆریای باکوورە بۆ نیشاندانی هێز لەو کاتەدا کە هاوسەنگیی هێز لە جیهاندا گۆڕاوە. 

لیم ئۆل-چول، پسپۆڕی کاروباری کۆریای باکوور لە زانکۆی کیونگنام دەڵێت: "دۆخی ئەمنیی جیهانیی بۆتە ناوچەیەکی بێ یاسا و پێوەرە نێودەوڵەتییەکان چیتر کاریگەر نین، کۆریای باکووریش ئەم بۆشاییە بەکاردەهێنێت بۆ تەواوکردنی جبەخانە ئەتۆمییەکەی".

ئەم خێراییە لە پەرەپێدانی چەکی نوێ، دوای کۆنگرەی پارتی کرێکارانی دەسەڵاتدار دێت کە لە شوباتدا بەڕێوەچوو. لەو کۆنگرەیەدا کیم جۆنگ ئونی سەرۆکی کۆریای باکوور جەختی کردەوە کە دۆخی ئەتۆمی وڵاتەکەی "نەگۆڕ و هەمیشەییە".

 پیۆنگیانگ بانگەشەی ئەوە دەکات کە ئەم بەرنامە سەربازییانە بۆ بەرگریکردنە لە هەر هەوڵێکی ڕووخاندنی ڕژێمەکەیان کە تۆمەتی ئەوە دەخەنە پاڵ ئەمریکا کە دەیان ساڵە هەوڵی بۆ دەدات.

لە تاقیکردنەوە نوێیەکاندا، جگە لە مووشەکە بالیستییەکان کە بەپێی سزاکان قەدەغەکراون، مووشەکی دژە کەشتیی و مووشەکی تاکتیکیی هەڵگری بۆمبی فرە کڵاوە بەکارهاتوون.

 شارەزایان ئاماژە بەوە دەکەن کە کۆریای باکوور لە ڕووی تەکنیکییەوە پێشکەوتنی بەدەستهێناوە و توانای بەکارهێنانی کڵاوەی ئەتۆمیی بچووککراوەی هەیە، هەروەها دەیەوێت بە چڕکردنەوەی مووشەکەکان، سیستەمەکانی بەرگریی ئەمریکا تووشی شێواوی بکات.

جگە لەمانە، پیۆنگیانگ بەم هەنگاوانە دەیەوێت بەهێزی هاوپەیمانییەکەی لەگەڵ ڕووسیا بسەلمێنێت. 

بەپێی ڕاپۆرتەکان، مۆسکۆ پشتیوانی ئابووریی و تەکنیکیی پێشکەش بە پیۆنگیانگ دەکات لە بەرامبەر ناردنی سەربازی کۆریای باکوور بۆ جەنگی ئۆکرانیا، ئەم پەیوەندییەش وای کردووە کە سزاکانی سەر کۆریای باکوور لە ڕاستییدا کاریگەرییەکەیان نەمێنێت.

کردنەوەی یەکەم پردی وشکانیی نێوان هەردوو وڵات و دەستپێکردنی پڕۆژەی هاوبەشی وەک "نەخۆشخانەی دۆستایەتی" لە وۆنسان، بەڵگەی ئەو نزیکبوونەوە قووڵەن، تەنانەت گفتوگۆ هەیە لەسەر هاوکاریی کشتوکاڵیی لە ناوچەی خێرسۆن کە لەژێر کۆنترۆڵی ڕووسیادایە.

 لە کۆتاییدا، هەرچەندە باس لە ئەگەری لووتکەی 4ەم لەگەڵ ئەمریکا دەکرێت، بەڵام کۆریای باکوور بە تەواوی ڕەتیدەکاتەوە دەستبەرداری چەکە ئەتۆمییەکەی بێت.