شارپرێس:
یسرائیل كاتس وەزیری بەرگری ئیسرائیل ڕۆژی سێشەممە سەردانی هێزەكانی وڵاتەكەی كرد لە باشوری سوریا و بەڵێنیدا ئامادەیی خۆیان لە ناوچەكەدا بپارێزن تا ئەو كاتەی هەڕەشە هەبێت.
لەم سەردانەدا كاتس ڕایگەیاند كە هێزەكانی ئیسرائیل ئۆپەراسیۆنی ڕۆژانە ئەنجام دەدەن بۆ پوچەڵكردنەوەی هەڕەشەكان و ڕێگریكردن لە دامەزراندنی هەر شتێك كە مەترسی لەسەر ئیسرائیل دروست بكات.
وەزیری بەرگری ئیسرائیل پەیامێكی ئاراستەی ئەحمەد شەرع، سەرۆكی سوریا كرد و ڕایگەیاند، "كاتێك بەیانیان لە كۆشكەكەت لە دیمەشق لە خەو هەڵدەستیت و سەیری چیای حەرمون دەكەیت سوپای ئیسرائیل دەبینیت، تێدەگەیت كە ئێمە لێرەین بۆ پاراستنی شارۆچكەكانمان و سنورەكانمان".
ئاماژەی بەوەشكرد، تا ئەو كاتەی هەڕەشە هەبێت، سوپای ئیسرائیل لێرە دەمێنێتەوە بۆ ئەوەی ئاسایشمان دەستەبەر بكات.