شارپرێس:
مەزڵوم عەبدی فەرماندەی پێشوی هێزەکانی سوریای دیموکرات (هەسەدە)و ڕاوێژکاری ئێستای سەرۆکایەتی کۆماری سوریا، لەچاوپێکەوتنێکی تێرو تەسەلدا باسی لەوەرچەرخانە مێژوییەکانی ڕۆژئاوای کوردستانو هۆکارەکانی هەڵوەشاندنەوەی هەسەدەو خۆبەڕێوەبەری کرد، عەبدی ڕایدەگەیەنێت، هەرچەندە دۆخی ئێستا ئەوەنییە کە گەلی کورد خەونی پێوەدەبینی، بەڵام "پێویستییەکی واقیعی" بوو بۆ ڕێگریکردن لە لەناوچونی یەکجاریی کورد لەسوریا.
ئایا ڕۆژئاوا تەسلیم کرا؟
لەوەڵامی ئەو ڕەخنانەی دەڵێن کورد هەموو دەستکەوتەکانی تەسلیم بەحكومهتهكهى شهرع کردوه، مەزڵوم عەبدی دەڵێت، "ناکرێت بڵێین تەسلیمبون بوو، بەڵکو گواستنەوەیە لەقۆناغی کارکردنی سەربەخۆ بۆ قۆناغی بەشداریکردن لەدەوڵەتدا"، عهبدى دان بەوەدادەنێت کە زۆرێک لەدەرفەتەکانی 15 ساڵی ڕابردوو وەک پێویست بەکارنەهێنراونو ئەگەر باشتر سودیان لێ وەربگیرایە، ئێستا کورد لەپێگەیەکی بەهێزترەوە گفتوگۆی لەگەڵ دیمەشق دەکرد.
هۆکارەکانی ڕێککەوتنی 29ی کانونی دوەم
مەزڵوم عەبدی ئاشکرایدەکات، حهوت بۆ ههشت مانگ لەمەوبەر (سەرەتای ئهمساڵ)، کورد ڕوبەڕوی هەڕەشەیەکی گهورهو لەناوبردنی یەکجاریی ببوەوە، هۆکارەکانیش دەگەڕێنەوە بۆ کشانەوەی هاوپەیمانان بهپلهى یهكهم، هێزە نێودەوڵەتییەکان (ئەمریکاو فەرەنسا) بڕیاری کشانەوەیانداو تەنها لەڕێگەی دیپلۆماسییەوە مابونەوە، دواتر هەڕەشەی شەڕ، ئەگەر ڕێککەوتن نەکرایە، شەڕێکی خوێناوییو ئاوارەبونی ملیۆنان کەس ڕویدەدا، دواتر پەیامەکەی ئۆجەلان هۆكارێكى دیكه بوو، عەبدی لهو ڕوهوه وتى، "عەبدوڵڵا ئۆجەلان نامەیەکی بۆ ناردینو تێیدا جەختیکردبوهوه، دەبێت کێشەکان لەگەڵ حکومەتی سوریا بەگفتوگۆ چارەسەربکرێنو کورد خۆی لەشەڕ لەگەڵ دیمەشق بەدوربگرێت".
پێگەی نوێی مەزڵوم عەبدیو داهاتوی سیاسیی
دوای هەڵوەشاندنەوەی هەسەدە لە 25ی مانگى ڕابردوو، مەزڵوم عەبدی بوەتە ڕاوێژکاری سەرۆکایەتی کۆماری سوریا بۆ کاروباری کورد، ئەو خۆى دەڵێت، "ئەرکی من پاراستنی مافە دەستورییەکانی کوردە لەناو دیمەشقدا".
هەروەها ئاماژەی بەوەشکرد، بەهۆی هەڵوەشاندنەوەی هەسەدە، بۆشاییەکی گەورە دروستبوەو ئەگەری هەیە لەداهاتودا بزوتنەوەیەکی سیاسی نوێ یان پارتێکی نوێ بۆ پڕکردنەوەی ئەو بۆشاییە دابمەزرێنن.
پەیوەندی لەگەڵ تورکیاو ئیسرائیل
مەزڵوم عەبدی ڕونیكردهوه، لە10ی ئاداری ساڵی 2025وه جۆرێک لەئاگربەست لەگەڵ تورکیا هەیەو هێرشەکان وەستاون، عهبدى ئامادەیی خۆی نیشاندا بۆ سەردانی تورکیا یان ئیمراڵی ئەگەر ئەوە خزمەت بەگەلی کورد بکات.
لهبارهى ئیسرائیلیشهوه، عەبدی ڕەتیکردەوە کە هیچ پەیوەندییەکیان لەگەڵ ئیسرائیل هەبێتو ئەو دەنگۆیانەشی بەناڕاست زانی کە دەڵێن "کورد پەشیمان دەبێتەوە لەڕێککەوتن لەگەڵ ئهحمهد شهرع".
قەیرانی ئابورییو ژیان لەڕۆژئاوا
یەکێک لەخاڵە هەرە سەختەکانی ڕێککەوتنەکە، دۆخی بژێویی خەڵکە، بۆ ئهوهش عەبدی دان بەوەدادەنێت کە دوای ئەوەی دیمەشق دەستی بەسەر کێڵگە نەوتییەکاندا گرتەوە، هەموو ئەو پاڵپشتییە داراییانەی پێشتر خۆبەڕێوەبەری بۆ نانو کارەباو سوتەمەنی دابینیدەکرد، بڕدراون، ئەمەش قەیرانی گەورەی بۆ خەڵک دروستکردوەو ئێستا خەریکی گفتوگۆن لەگەڵ دیمەشق بۆ چارەسەرکردنی.
ئایندەی دەستور
مەزڵوم عەبدی چاوەڕواندەکات لە دوو بۆ سێ مانگی داهاتودا لیژنەی نوسینەوەی دەستوری نوێی سوریا پێکبهێنرێتو کوردیش وەک پێکهاتەیەکی سەرەکی بەشداربێت، بهوتهى ئهو، "ئامانجی سەرەکی ئەوەیە کە ئەو ڕێککەوتنانەی لەگەڵ دیمەشق کراون (وەک خوێندن بەزمانی کوردیو ناسنامەی نەتەوەیی) لەدەستوردا بچەسپێنرێن".
"شەڕ وەستاوە، بەڵام خەونەکان نەهاتونەتەدی"
مەزڵوم عەبدی لەکۆتایی قسەکانیدا دەڵێت، "هەست بەئاسودەیی دەکەم کە چیتر گەنجەکانمان لەشەڕدا شەهید نابن، بەڵام خەمبارم کە هێشتا هەموو ئامانجەکانمان بەدەستنەهێناوە"، جەختدەکاتەوە، "ئەوەی ئێستا هەیە، کۆتایی نییە، بەڵکو دەستپێکی خەباتێکی نوێیە لەناوجەرگەی دەوڵەتی سوریادا".
