شارپرێس:
وەزیری دەرەوەی ئێران لەنوێترین لێدوانیدا جارێكی دیكه پێداگریی وڵاتەكەی لەسەر بەردەوامیدان بەپیتاندنی یۆرانیۆم دوپاتده‌كاته‌وه‌و قەرەبوى زیانەکانی شەڕی مانگی ڕابردوی كردوەتە مەرج بۆ ئیدارەی ترەمپ، بۆ دەستپێکردنەوەی دانوستانە ئەتۆمییەکان.
عەباس عێراقچی وەزیری دەرەوەی ئێران، ئەمڕۆ لەچاوپێكەوتنێكدا لەگەڵ ڕۆژنامەی فاینانشیاڵ تایمزی بەریتانی وتویه‌تى، "پێویستە ئەمریکا قەرەبومان بکاتەوە پێش چونە ناو هەر دانوستانێکی ئەتۆمی، تاران ڕازینابێت بەگەڕانەوە بۆ دۆخی ئاسایی لەدوای جەنگ لەگەڵ ئیسرائیل، هەروەها ناشگەنە ڕێککەوتن تا واشنتۆن بەردەوامبێت لەداوای ڕاگرتنی پیتاندنی یۆرانیۆم".
عێراقچی هەر لەو چاوپێکەوتنە ڕۆژنامەوانیەدا وتویه‌تى، "ئێران هێشتا توانای پیتاندنی یۆرانیۆمی هەیە، لەکاتی جەنگ‌و دوای جەنگیش پەیامم لەگەڵ ستیڤ ویتکۆف نوێنەری ئەمریکا ئاڵوگۆڕکردوە".
ئەو قسانەی وەزیری دەرەوەی ئێران، دوای چەند کاتژمێرێک دێت لەڕاگەیاندنی سزا نوێیەکانی ئەمریکا بەسەر تاراندا، کە زیاتر لە115 کەس‌و قەوارەو کەشتیی کردوەتە ئامانج، لەنێویاندا، محەمەد حسێن شەمخانی کوڕی عەلی شەمخانی ڕاوێژکاری نزیکی عەلی خامنەیی، ڕابەری باڵای ئێران.
