شارپرێس:

سیاسه‌تمه‌دارێكى ناسراوى كورد هۆشداریی به‌لایه‌نه‌ سیاسییه‌كانى هه‌رێم ده‌دات‌و ڕایده‌گه‌یه‌نێت، "ئەو دۆخەی ئەمڕۆ لەڕۆژئاوا دەگوزەرێت، مەترسی‌و ئەگەری هەیە لەهەر پارچەیەكی دیكه‌ى ئەم نیشتمانە دوبارە بێتەوە"، ده‌شڵێت، "گەلی كورد لەهیچ پارچەیەكی ئەم نیشتمانە لەبارودۆخێکی سەقامگیرو ئارامدانییە"، ده‌شڵێت، "مەترسیەکان بۆسەر هەر پارچەیەک وەکو بەشێک لەڕوداوە کارەساتبارو تراژیدیەکانی مێژوی نەتەوەو نیشتیمانەکەمان بەردەوامن".

عوسمانی حاجی مەحمود سیاسه‌تمه‌دارى ناسراوى كوردستان له‌په‌یامێكدا كه‌ تایبه‌ته‌ به‌دۆخى ڕۆژئاواى كوردستان‌و هۆشداریش به‌ده‌سه‌ڵاتدارانى هه‌رێم ده‌دات نوسیویه‌تى، "دۆخی هێرش‌و پەلاماردانی پر ئازاری ئەم چەند ڕۆژەی ڕابردوو كە بەسەر ڕۆژئاوای کوردستان هێنرا، دەرس‌و ئەزمونێكی نوێ‌و گرنگی پێبەخشین".

ده‌شڵێت، "ڕوداوەكان سەلماندیان كە گەلی كورد لەهیچ پارچەیەكی ئەم نیشتمانە لەبارودۆخێکی سەقامگیرو ئارامدانییەو مەترسیەکان بۆسەر هەر پارچەیەک، وەکو بەشێک لەڕوداوە کارەساتبارو تراژیدیەکانی مێژوی نەتەوەو نیشتیمانەکەمان، بەردەوامن، زەمەن‌و ڕوداوەکان گەواهیدەری ئەوەن هەرکات دەسەڵاتدارانی ئەو وڵاتانەی کە کوردستانیان بەسەردا دابەشکراوە هەلیان بۆ بڕەخسێت، لەسەر هەمان عەقڵیەتی قبوڵنەکردن‌و سڕینەوە بەردەوامن".

ئه‌و سیاسه‌تمه‌داره‌ ناسراوى كوردستان جه‌ختده‌كاته‌وه‌، "ڕوداوە خێراكان پێى وتین، چۆن لەچركەساتێكدا دەكرێت زۆرشت بگۆرێت‌و دەرگای هەموو ئەگەرەكان بەڕوی ئەم نەتەوە بەشمەینەتەدا بكرێتەوە، بەڵام لەپاڵ ئەوەشدا ئەو سەرمایە مرۆییە نەتەوەیی‌و نیشتمانییە مەزنەی نیشاندایین، كە چەند دڵسۆزو بەئیرادەن، چەند بەهەست‌و ئامادەن لەبەرامبەر پرسە ڕەواو هەستیارەكانی گەلەكەمان".

وه‌كو له‌به‌شێكى دیكه‌ى په‌یامه‌كه‌یدا هاتوه‌، "یەكگرتویی ئەم چەند ڕۆژەی كوردانی هەموو پارچەكان‌و هەندەران، پەیامێكی زۆر بەبایەخی تیا بەدیكرا، پەیامێك كە هەقە شوكهێنەربێت بۆ دەستەبژێری سیاسیی‌و حوكمڕانی‌و حزبیی، مرۆڤ كاتێك ئەو جۆش‌و خرۆشە بۆ دەربڕینی ناڕەزایەتی بەوشێوە فراوانە مەدەنیانە دەبینێت، كاتێك ئامادەیە بۆ دەستدانە چەك‌و كاری خۆبەشی، بۆ بەخشین‌و بەدەنگەوەهاتن، ئەو ڕاستییەی لا چەندبارە دەبێتەوە كە كومەڵگەی ئێمە سەرباری ئەو دۆخەی لەناوەوەو دەرەوە بۆی دروستكراوە، بەڵام هێشتا زیندوەو بەئاگایە".

عوسمانى حاجى مه‌حمود ئه‌وه‌شى ڕونكردوه‌ته‌وه‌، "لەهەموو قۆناغە سەختەكانیشدا هەمیشە دڵنیابوم لەوەی کە گەلەکەمان هیچی لەگەلانی دیكه‌ کەمتر نییەو گەلێکی نیشتیمانپەروەرەو لەپێناوی نەتەوەو نیشتیماندا خەبات‌و فیداکاریی زۆریکردوەو قوربانی زۆریشیداوە، سەرسەختانە بەبەردەوامی ئامادەی قوربانیدان بوە".

وه‌كو ده‌ڵێت، "بەڵام بەهۆی خواروخێچی‌و خراپی ئەو عەقڵیەت‌و فۆڕمەی دەسەڵاتدارانی هەرێم گرتویانەتەبەرو پەرەسەندنی گەندەڵی‌و قۆرخكاریی‌و بێباكی بەشی زۆری کۆمەڵانی خەڵک لەمجۆرە فۆڕمی حوکمڕانی‌و حزبایەتییە، ماندوو بێزارو بێمتمانە بون، بەڵام ئەمە نەبوەتە هۆی کۆڵدان لەجێبەجێکردنی ئەرکی کوردایەتی‌و نیشتیمانپەروەرییان".

ئه‌وه‌شى باسكردوه‌، "پشتیوانییەكانی ڕۆژئاوای کوردستان بەو شێوە فراوانە، پەیامی خۆی گەیاندە وڵاتان‌و دەزگاو دامەزراوە جیهانییەکان، کە تائێستا واقیعی فەرزكراوی ڕێككەوتنی سایسبیكۆ قبوڵكراو نییەو قبوڵی ئەوەشناكرێت وەك ڕابردوو بكرێینە كارتی گوشارو چاو لەئاستی مافەكانی ئەم گەلە دابخرێت".

هۆشداریش به‌سیاسیى ‌و ده‌سه‌ڵاتداره‌كانى هه‌رێم ده‌دات‌و ڕایده‌گه‌یه‌نێت، "پەیامی ئەم دەنگە زوڵاڵە بۆ پارتە سیاسییە دەسەڵاتدارەکانی هەرێمیشه‌ کە پێیاندەڵێن، پێویستە هەڵوێستێکی جدی‌و سەرڕاستانە بکرێت‌و ئاوڕێکی بەرپرسیارانە لەدۆخی کوردستان‌و دەوربەری خۆتان بدەنەوە، واتە ئەو دۆخەی ئەمڕۆ لەڕۆژئاوا دەگوزەرێت، مەترسی‌و ئەگەری هەیە لەهەر پارچەیەكی دیكه‌ى ئەم نیشتمانە دوبارە بێتەوە".

هه‌ر له‌و په‌یامه‌یدا، عوسمانى حاجى مه‌حمود ده‌سه‌ڵاتدارانى هه‌رێم ئاگادارده‌كاته‌وه‌و ڕایده‌گه‌یه‌نێت، "بۆیە تا کار لەکارنەترازاوە، پێویستە بگەڕێنەوە بۆ پابەندبون بەبنەمای نیشتیمانی‌و نەتەوەییەوەو بەرژەوەندییە باڵاکانی گەلەکەمان لەبەرچاوبگیرێت، بەجۆرێکی وا كە لەلایەن هیچ حزب، هێزێك، لایەن‌و کەسێکەوە نەبەزێنرێت، سەروەری هەرێم‌و تێكۆشان بۆ گەڕانەوەی كەركوك‌و ناوچەكانی دەرەوەی هەرێم، پاراستنی سەروەت‌و داهاتی کوردستان، عەدالەتی کۆمەڵایەتی، مافی هاوڵاتیبون بنەماو ئامانجی حوکمڕانیی بێت".

له‌كۆتاییشدا به‌بیرى ده‌هێنێته‌وه‌، "لەم جیهانەی کە بەرژەوەندیی سەرچاوەی بڕیارو خاڵی یەکلاکەرەوەیە، مەحەکی ڕاست‌و دروست بۆ پاراستنی دەستکەوت‌و بەدیهێنانی تەواوی مافەکانمان، یەکترقبوڵکردن‌و ڕێکەوتن‌و یەکڕیزیی نەتەوەو نیشتیمانەکەمانە، لەگەڵ خوێندنەوەو تێگەیشتنی دروست بۆ هاوکێشە جیهانی‌و هەرێمایەتیەکان".