شارپرێس:
لەکاتێکدا سوریا قۆناغێکی ڕاگوزەری هەستیار بەڕێدەکات، دەنگی کۆنگرێسی ئەمریکا جارێکی دیکە وەک قەڵغانێک بۆ پاراستنی کورد بەرزبوەوە، براین ماست سەرۆکی لیژنەی پەیوەندییەکانی دەرەوە، پەیامێکی ڕونى ئاراستەی دیمەشق کردو هۆشداریداو وتى، "هێرش بۆسەر کورد، هێڵی سورە"، دهشڵێت، "چهندینجار پهیوهندیم بهژهنراڵ مهزڵوم عهبدیهوه كردوهو دهمهوێت دڵنیابمهوه لهپاراستنى ههسهدهو گهلى كورد".
لەدانیشتنی تایبەتی لیژنەی پەیوەندییەکانی دەرەوە لەئەنجومەنی نوێنەران كه دوێنێ بهڕێوهچوو، براین ماست سەرۆکی لیژنەکە ڕایگەیاند، "ئەمریکا بەهیچ شێوەیەک هێرش بۆسەر کورد قبوڵناکات".
ماست ئاماژەی بەوەشکرد، کورد هاوپەیمانی سەرەکیو جێی متمانەی ئەمریکانو هەر هەنگاوێک دژی ئەوان، هەنگاوێکی هەڵەیە لەئاراستەیەکی مەترسیداردا".
دوای ئەوەی لەتشرینی دوەمی 2025 سوریا هیوایەکى هەبوو بۆ لابردنی سزاکانی "یاسای قەیسەر"، ئێستا واشنتۆن هەڕەشەی پێچەوانە دەکات، ماست هۆشداریداو وتى، "حکومەتی سوریا بەسەرۆکایەتی ئەحمەد شەرع، نەیتوانیوە متمانەی تەواو لای ئەمریکا دروستبکات، بەتایبەت بەهۆی فشارە سەربازییەکانی ئەمدواییەی سەر ناوچە کوردییەکانو کەمینەکانى دیكهى سوریا".
براین ماست لهكۆبونهوهكهى كۆنگرێسدا ئاشكرایكرد، پەیوەندیی ڕاستەوخۆی لەگەڵ مەزڵوم عەبدی فەرماندەی گشتیی هەسەدە ئهنجامداوه، پهیوهندییهكهشى بۆ دڵنیابونەوەى بوه لەڕەوشی مەیدانییو پاراستنی دەستکەوتەکانی کورد لەباکورو ڕۆژهەڵاتی سوریا.
وهكو براین ماست جهختى لهسهر كردهوه، لێدوانهكانیان نیشانەی ئەوەن، پرسی کورد بۆ ئەمریکا تەنها پرسێکی ناوخۆیی سوریا نییە، بەڵکو "ئاسایشی نەتەوەیی ئەمریکا"شە، هەر هەوڵێک بۆ تێکدانی قەوارەی کورد لەسوریا، ڕەنگە ببێتە هۆی گەڕانەوەی توندی سزاکانی ئەمریکاو پچڕانی پەیوەندییە دیپلۆماسییەکان لەگەڵ دیمەشق.
براین ماست كێیه؟
سیاسەتمەدارێکی ئەمریکییەو لەئێستادا وەک یەکێک لەکەسایەتییە کاریگەرەکان لەسیاسەتی دەرەوەی ئەمریکا بەرامبەر سوریاو ڕۆژهەڵاتی ناوەڕاست دەناسرێت.
براین ماست ئەندامی پارتی کۆمارییەو نوێنەرایەتی ویلایەتی فلۆریدا دەکات لەئەنجومەنی نوێنەرانی ئەمریکا، لەساڵی 2025وه وەک سەرۆکی لیژنەی کاروباری دەرەوە لەئەنجومەنی نوێنەران دەستبەکاربوە.
پێشئەوەی بچێتە نێو کایەی سیاسیی، بۆ ماوەی زیاتر لە 12 ساڵ لەسوپای ئەمریکادا خزمەتیکردوە وەک پسپۆڕی پوچەڵکردنەوەی بۆمب، لەساڵی 2010 لەکاتی ئەرکێکدا لەئەفغانستان، بەهۆی تەقینەوەیەکەوە، هەردوو قاچی لەدەستدا.
ماست وەک داکۆکیکارێکی سەرسەختی پاراستنی کوردو هێزەکانی سوریای دیموکرات (هەسەدە) دهناسرێت، چەندینجار جەختیکردوەتەوە، هێرش بۆسەر کورد قبوڵکراو نییەو دەبێت وەک هاوپەیمانێکی سەرەکی ئەمریکا بمێننەوە.
هاوكات ماست، ڕۆڵێکی سەرەکی دەگێڕێت لەدیاریکردنی چارەنوسی "یاسای قەیسەر"و سزاکانی سەر سوریا، هەرچەندە پێشتر لەگەڵ ئەحمەد شەرع کۆبوەتەوە، بەڵام ئێستا یەکێکە لەتوندترین ڕەخنەگرانی حکومەتی سوریا بەهۆی فشارەکانیان بۆسەر کەمینەکانو بهتایبهت گهلى كورد.
چاودێرانى دۆخى سوریاو ڕۆژئاواى كوردستان ئاماژه بهوهدهكهن، بهگوێرهى ئهوهى دوێنێ لهكۆنگرێسى ئهمریكا ڕویدا، هێزەکانی سوریای دیموکرات (هەسەدە) تەنها هێزێکی ناوخۆیی نین، بەڵکو سیمبولی هاوبەشیی ستراتیژیی ئەمریکان لەناوچەکەدا.
لهو ڕوهشهوه ماست بەڕاشکاوی وتى، "واشنتۆن لەڕەفتارەکانی حکومەتی ئەحمەد شەرع بەرامبەر کەمینەکانو بهتایبهت گهلى کورد زۆر نیگەرانە".
ئەو هۆشدارییدا کە هەر هەوڵێک بۆ لاوازکردنی پێگەی کورد، وەک خیانەت لەو هاوبەشییە دەبینرێت کە بەخوێنی هەزاران شەڕڤان لەدژی تیرۆر بونیادنراوە.
ماست ئهوهشى وت، "سوریا هێشتا نەگەیشتوەتە ئەو ئاستەی لێی چاوەڕواندەکرێت"، شرۆڤهكارانیش پێیانوایه ئەمە ئاماژەیەکی ڕونە بۆ ئەوەی کە تێپەڕاندنی سزاکانی "یاسای قەیسەر"و ئاساییبونەوەی پەیوەندییەکان، تەنهاو تەنها بەڕێڕەوی پاراستنی مافەکانی کوردو کەمینەکاندا تێدەپەڕێت، چونكه واشنتۆن نایەوێت دیکتاتۆرییەتێکی نوێ جێگەی پێشوو بگرێتەوە، بەڵکو داوای سۆسیال-کۆنتراکتێکی نوێدەکات کە تێیدا کورد وەک لایەنێکی سەرەکیو پارێزراو بمێنێتەوە.
