شارپرێس:
لەکاتێکدا جیهان ئاهەنگی بۆ ڕوخانی ڕژێمی ئەسەد دەگێڕا، هۆڵەکانی کۆنگرێسی
ئەمریکا لە 10ی شوباتی 2026 شایەتی دانیشتنێکی پڕ لەترسو هۆشداریی بون، تەوەری سەرەکی
دانیشتنەکە یەک پرسیار بوو، ئهویش ئایا کورد دەبێتە قوربانیی ڕێککەوتنە سیاسییەکانی
دوای ئەسەد؟
هەڕەشەی جینۆساید ئاشكرابوو .. "بەڵگەی سەربڕین لەئارادایە"
نادین ماینزا سەرۆکی پێشوی لیژنەی ئازادییە ئایینییەکان، هۆشدارییهكى
توندى ڕاگهیاندو وتى، "بەڵگەى مەیدانیم هەیە لەسەر سەربڕینو ئەشکەنجەدانی شەڕڤانانی
کورد لەلایەن ئەو گروپە چەکدارانەی کە ئێستا بونەتە بەشێک لەدەزگا ئەمنییە نوێیەکانی
دیمەشق".
ماینزا داوای یاسای "ڕزگارکردنی کورد (Save
the Kurds Act)ى کردو جەختیکردەوە،
"نابێت واشنتۆن پەیوەندییەکانی لەگەڵ دیمەشق ئاسایی بکاتەوە بەبێ گەرەنتی
پاراستنی ناوچە کوردییەکان".
فێڵێکی سیاسیی بەناوی "تێکەڵکردنی هێزەکان"
ئەندرۆ تابلەر لێکۆڵەری ناودار پەردەی لەسەر فێڵێکی مەترسیدار لادا،
ئەو دەڵێت، "ئەوەی لەدیمەشق ڕودەدات تەنها گۆڕینی ئاڵاکانە نەک چاکسازیی ڕاستەقینە،
گروپە توندڕەوەکانو میلیشیاکانی سەر بەتورکیا، هێشتا لەژێر فەرمانی سەربەخۆی خۆیاندان،
ئەمەش وایکردوە ناوچە کوردییەکان لەناو تەمومژێکی ئەمنییو سیاسیی مەترسیداردابن".
پەیوەندییەکی "کاتییو بەرژەوەندیخوازانە"
جەیمس جێفری نێردەی پێشوی ئەمریکا، ڕاستییەکی تاڵ بەگوێی کورداندا دەداتەوەو
دهڵێت، "پەیوەندیی ئەمریکاو هێزەکانی سوریای دیموکرات (هەسەدە) هەمیشە کاتیی،
تاکتیکیو دولایەنە بوە".
هەرچەندە ئەو باس لە"بەرپرسیارێتییەکی ئەخلاقی" دەکات بۆ
پاراستنی کورد، بەڵام ئاماژە بەوەشدەکات، دواجار دەبێت کورد لەناو دەوڵەتێکی ناوەندیی
یەکگرتودا بتوێتەوە، ئەمەش گەورەترین مەترسییە بۆ سەر قەوارەی خۆبەڕێوەبەریی.
شەڕی "زمان"و "ناسنامە"
دکتۆرە مارا کارلین ئاماژە بۆ خاڵێکی جەوهەری دەکات، ئهویش ناسنامەی
نەتەوەیی، ئەو دەڵێت، "ئەگەر دیمەشق دەیەوێت کورد متمانەی پێبکات، دەبێت زمانی
کوردی وەک زمانێکی نیشتمانیی بناسێنێت، بەبێ ئەمە، هەر ڕێککەوتنێک تەنها کاتکوشتنەو
کورد هەست بەئاسایش ناکات لەداهاتوی سوریادا".
ئەو دانیشتنەی کۆنگرێس دەریخست کە کورد لەبەردەم تاقیکردنەوەیەکی
بونگەراییدایە، دەسەڵاتی نوێ-ش لەدیمەشق، مەیلی بۆ ناوەندگەرێتییەکی توند هەیە کە
جێگەی "خۆبەڕێوەبەری" تێدا نابێتەوە.
ئەمریکا "سزاکان" وەک فشار بەکاردههێنێت، تەنها کارتی
فشار کە کورد مابێتی، بەستنەوەی هاوکارییەکانی ئەمریکاو لادانی سزاکانی "یاسای
قەیسەر"ە بەمەرجی پاراستنی کورد.
مەترسیی "ئیسلامی سیاسيی"، بەرزبونەوەی پلەی کەسانی توندڕەو
لەناو دەزگا ئەمنییەکانی دیمەشق، هەڕەشەیەکی ڕاستەوخۆیە بۆ سەر مۆدێلی "فرەییو
پێکەوەژیان" کە هەسەدە بونیادی ناوە.
ڕاپۆرتەکە هۆشداریدەدات کە "ئاشتییەکی ڕوکەش" لەگەڵ دیمەشق
لەوانەیە تەنها سەرەتایەک بێت بۆ کۆتاییهێنان بەدەستکەوتەکانی کورد، ئەگەر گەرەنتی
نێودەوڵەتیو یاسایی بەهێز لەئارادانەبێت.
