شارپرێس:
ڕێکخراوی سی پی تی ئەمریکی ڕایگەیاند، هێرشەکان بۆ سەر هەرێمی کوردستان بەردەوامن و ژمارەی قوربانییان ڕوو لە زیادبوونن.

بەگوێرەی ئامارێکی ڕێکخراوەکە، "لە ٢٨ی شوباتەوە، سوپای پاسدارانی ئێران و گروپە هاوپەیوەندەکانی، (٣٠٧) هێرشیان کردۆتە سەر هەرێمی کوردستان و بەهۆیەوە (٨) کەس کوژراون و (٥١) کەسی تر برینداربوون."

تیمی کوردستانی عێراقی ڕێکخراوی CPT دەڵێت، لە ٧ی ئادار تاوەکو ١٥ی ئادار، سوپای پاسدارانی ئێران و گروپە هاوپەیوەندەکانی، (١١١) هێرش و بۆردوومانییان و بۆسەر هەرێمی کوردستانی عێراق ئەنجامداوە و لە ئەنجامی ئەو هێرشانەدا، (٣٦) کەس بوونەتە قوربانی کە (٤)یان گیانیان لەدەستداوە و (٣٢)ی تریان برینداربوون. بەراورد بە هەفتەی یەکەمی شەڕەکە، کە سوپای پاسداران و گروپە هاوپەیوەندەکانی (١٩٦) هێرش و بۆردوومانییان بۆ سەر هەرێمی کوردستان ئەنجامدابوو، ژمارەی هێرشەکان بە ڕێژەی (٤٣.٥٪) کەمیکردووە. بەڵام بەراورد بە ژمارەی قوربانییان، کە لە هەفتەی یەکەمی شەڕەکەدا، (٢٣) کەس بووبونە قوربانی، ژمارەی قوربانییان بە ڕێژەی (٥٦.٥٪) زیادیکردووە. بەشێوەیەکی گشتی لە سەرەتای دەستپێکردنی جەنگەکەوە، (٣٠٧) هێرش و بۆردوومان بۆ سەر هەرێمی کوردستان ئەنجامدراوە و (٥٩) کەسیش بوونەتە قوربانی.

هەروەها بەگوێرەی ئامارەکە، لە ماوەی یەک هەفتەی ڕابردوودا، سوپای پاسدارانی ئێران و گروپە هاوپەیوەندەکانی لە عێراق، (٨١) هێرشیان بۆ سەر سنوری پارێزگای هەولێر ئەنجامداوە، بەمەش کۆی گشتی هێرشەکان لەسەرەتای جەنگەکە  بۆ سەر سنوری ئەو پارێزگایە (٢٤٣) هێرش بووە. لە سنوری پارێزگای سلێمانیش (٣٠) هێرش ئەنجامدراوە، بەمەش کۆی گشتی هێرشەکان بۆ سەر سنوری ئەو پارێزگایە دەبێتە (٥٦) هێرش. لە ماوەی یەک هەفتەی ڕابردووشدا، هیچ هێرشێک لە سنوری پارێزگای دهۆک و هەڵەبجە ڕووینەداوە و لە سەرەتای جەنگەکەوە، (٥) هێرش بۆ سەر سنوری پارێزگای دهۆک و (٣) هێرشیش بۆ سەر سنوری پارێزگای هەڵەبجە بووە.

دەشڵێت، لە کۆی (١١١) هێرش بۆسەر هەرێمی کوردستان لە هەفتەی ڕابردوودا، سوپای پاسدارانی ئێران (٦٤) هێرش و گروپە هاوپەیوەندەکانیشی لە عێراقدا (٤٧) هێرشیان ئەنجامداوە. (٧٦) هێرش لە رێگەی بەکارهێنانی فڕۆکەی بێفڕۆکەوانی خۆکوژ و (٢٤) هێرش لە ڕێگەی مووشەک و (١٠) هێرش لە ڕێگەی تۆپخانەکان و (١) هێرشیش لە ڕێگەی تەقەکردنەوە بووە، کە تیایدا سەربازانی سوپای پاسداران، بە هەڕەمەکی تەقەیان بە ڕووی گوندی قندۆڵ لە سنوری قەزای پشدەردا کردووە.

ڕونیشیکردەوە، لە هێرشەکانی هەفتەی ڕابردوودا، کۆنسوڵخانە و بارەگای سەربازی و دامەزراوەکانی پەیوەند بە حکومەتی ئەمریکا لە هەرێمی کوردستان (٣٩) جار بە ئامانجگیراون و لەسەرەتای جەنگەکەشەوە (٩٧) جار هێرشیان کراوەتە سەر. هەروەها، کامپی پەنابەرانی کوردانی ڕۆژهەڵات و بارەگای سەربازی حزبە کوردییەکانی ڕۆژهەڵات لە هەرێمی کوردستان (٤٣) جار بەئامانجگیراون و لە سەرەتای جەنگەکەشەوە (٨٦) جار هێرشیان کراوەتە سەر. بارەگاکانی سەر بە وەزارەتی پێشمەرگە، ناوچە مەدەنی نشینەکان، کۆنسوڵخانەی ئیمارات، کێڵگە نەوتییەکان، بارەگای سەربازی هێزەکانی هاوپەیمانانی نا بەشدار لەو جەنگە، شوێنە گشتییەکان (٢٩) جار کراونەتە ئامانج و لە سەرەتای جەنگەکەشەوە (١٢٤) جار هێرشیان کراوەتە سەر.

ڕێکخراوەکە ئاشکراشیکردووە، کۆی گشتی قوربانییانی هێرشەکانی هەفتەی ڕابردوو بۆ سەر هەرێمی کوردستان (٣٦) قوربانی (٤) کوژراو و (٣٢) بریندارە، کە لەو ژمارەیە (١١) قوربانی (٣) کوژراو و (٨) بریندار، چەکدار یاخود ئەندامی حزبە کوردییە چەکدارەکانی ڕۆژهەڵاتی کوردستانن. (١٢) قوربانی تر (١) کوژراو و (١١) بریندار، پاسەوان، پێشمەرگە، چەکداری بیانی نا بەشدار لەو جەنگە بوون. (١٣) قوربانی تر کە هەموویان برینداربوون، هاووڵاتی مەدەنین. بەمەش کۆی گشتی قوربانییان لەسەرەتای جەنگەکەوە لە هەرێمی کوردستان (٥٩) قوربانی (٨) کوژراو و (٥١) بریندارن.