شارپرێس:

لەکاتێکدا جیهان چاوەڕێی "تۆڵەیەکی گەورە"و هێرشێکی وێرانکەربوو کە ئیسرائیل ناوینابوو "نەڕەی شێر"، میدیاکانی ئێران‌و تۆڕە کۆمەڵایەتییەکان بەگاڵته‌جاڕیی‌و تەنزەوە پێشوازییان لەئەنجامی هێرشەکان کرد، دەستەواژەی "نەڕەی شێر بوو بەمیاوی پشیلە" بوە سەردێڕی سەرەکی ئەو گوتارە میدیاییەی کە دەیەوێت پەیامێک بداتە جیهان‌و بڵێت، "خەونی ئەمریکاو ئیسرائیل تێکشکا".

ناوێکی گەورەو کردارێکی بچوک
ئیسرائیل بەهەموو قورساییەکی میدیایی‌و سەربازییەوە، ئۆپەراسیۆنی "نەڕەی شێر"ی ڕاگەیاند، ئامانجەکە تەنها لێدانی بنکە سەربازییەکان نەبوو، بەڵکو دروستکردنی شۆک‌و ترس بوو لەناو دڵی تارانی پایتەختدا، بەڵام دوای تێپەڕبونی چەند کاتژمێرێک، میدیای ناوخۆیی ئێران وێنەی شەقامە ئارامەکانی تاران‌و ژیانی ئاسایی خەڵکیان بڵاوکردەوە، وەک وەڵامێکی ناڕاستەوخۆ بۆ ئەوەی کە "شێرەکە تەنها میاوێکی لێوە هاتوە".

تێکشکان لەسەر سەکۆ میدیاییەکان
ئەم شەڕە تەنها بەموشەک‌و فڕۆکە نەبوو، بەڵکو شەڕی "وێنە" بوو، بڵاوکردنەوەی وێنەی پشیلەیەک لەتەنیشت لۆگۆی ئۆپەراسیۆنەکەی ئیسرائیل، گوزارشت بوو لەشکستی ستراتیژیی ئەو هێرشەی کە بڕیاربوو "هاوسەنگی هێز" لەناوچەکەدا بگۆڕێت، میدیاکانی نزیک لەسوپای پاسداران دەڵێن، "ئەو خەونەی ئیسرائیل بۆ لاوازکردنی ئێران هەیبوو، لەگەڵ یەکەم بەرپەرچدانەوەی سیستەمی بەرگریی ئاسمانی بوو بەدوکەڵ".

پەیامی سیاسیی لەپشت تەنزەکانەوە
بەکارهێنانی زمانی تەنز لەلایەن میدیای ئێرانەوە بەڕێکەوت نییە، ئەمە تاکتیکێکی سیاسییە بۆ کەمکردنەوەی بایەخی هێرشەکەو نیشاندانی ئەوەی کە ئیسرائیل توانای گۆڕینی واقیعی نییە، هه‌روه‌ها بۆ بەرزکردنەوەی ورەی ناوخۆو دڵنیاکردنەوەی هاوڵاتیان کە هێزی وڵاتەکەیان پارێزراوە، له‌گه‌ڵ پێشاندان بەئەمریکا کە پاڵپشتییە سەربازییەکانی بۆ ئیسرائیل نەیتوانیوە ئامانجی "تێشکاندنی ئێران" بپێکێت.

ئایا شێرەکە دەخەوێت؟
ئێستا کە تۆزی هێرشەکە نیشتوەتەوە، تاران بەدەم پێکەنینەوە باس لە"میاوی پشیلە" دەکات، بەڵام چاودێران دەپرسن، ئایا ئەمە کۆتایی چیرۆکەکەیە یان تەنها وەرزی یەکەمی زنجیرەیەکی درێژخایەنی پێکدادانە؟ ئەوەی ڕونە، خەونی "نەڕەی شێر" لانی کەم لەڕوی دەرونییەوە، لەشەقامەکانی ئێراندا ڕاونەکرا.