شارپرێس:

پاش کشانەوەی دۆناڵد تره‌مپ لەئەنجامدانی هێرشی سەربازیی بۆسەر ئێران، هێزە چەکدارەکان لەعێراق هاویشتنی موشه‌كى بالیستییان دواخست، هاوکات بەغدا خۆی بۆ خراپترین ئەگەری پەرەسەندنی سەربازیی ئامادەدەکات‌و چاودێریی توندی جوڵەی فڕۆکە بێفڕۆکەوانەکان لەنەینەواوە تا بیابانی نەجەف دەستپێکردوە.

ڕێوشوێنە توندەکانی بەغداو مەرجی واشنتۆن
واشنتۆن بەوردی چاودێریی هەنگاوەکانی عەلی زەیدیی سەرۆک وەزیرانی عێراق دەکات دوای کۆبونەوەی لەگەڵ دۆناڵد تره‌مپ سەرۆکی ئەمریکا، دۆسیەی کۆنترۆڵکردنی چەک‌و قەدەغەکردنی بەکارهێنانی خاکی عێراق بۆ هێرشکردنەسەر وڵاتانی دراوسێ، تەوەرە سەرەکییەکانی ئەو چاودێرییەن، لایەنی عێراقی ڕێوشوێنی مەیدانی گرتوەتەبەرو سزای توند بەسەر هەر بەرپرسێکی ئەمنیدا دەسەپێنێت کە موشه‌ك یان درۆن لەسنوری خاكى عێراقه‌وه‌ بتەقێنرێت.

پێکهێنانی لیژنەی ڕێگریی‌و کەمکردنەوەی مەترسیی هێرشەکان
سەرۆک وەزیرانی عێراق بڕیاری پێکهێنانی لیژنەیەکی ئەمنی هاوبەشیداوە بۆ دانانی سزاو به‌ربه‌ست لەدژی هەر پێشێلکارییەک، له‌وباره‌یه‌وه‌ حەیدەر عەبودی وتەبێژی حکومەت ڕایگەیاندوە، هەڵوێستی توندی سەرۆک وەزیران، عێراقی لەهێرشێکی سەربازیی مسۆگەر بەدورگرتوە، سەرەڕای ئەمەش، مەترسییەکان لەسەر بەکارهێنانی موشه‌كى بالیستی هێشتا بەردەوامن.

توندبونی ناکۆکییە ناوخۆییەکانی چوارچێوەی هەماهەنگی
گروپه‌ چەکدارەکان مۆڵەتیان تا ڕۆژی هەینی داوەتە حکومەت بۆ وەڵامدانەوەی سعودیە، سەرچاوەکانیش ئاشکرایانکردوە، ناکۆکی قوڵ لەناو چوارچێوەی هەماهەنگیدا هەیە بەهۆی سەرکردەیەکی دیار کە سەرپەرشتی گروپێک دەکات، هەڕەشەی هێرشکردنەسەر ئوردنی کردوە، ئەمەش لەکاتێکدایە واشنتۆن داوای داماڵینی چەکی گروپه‌كان دەکات.

هاوپەیمانیی عەرەبی-ئەمریکی دژ بەبریکارەکانی ئێران
میسال ئالوسی كه‌سایه‌تى سیاسیی سەربەخۆ ئاماژه‌ى به‌وه‌داوه‌، ستراتیژی ئەمریکا بۆ بێلایەنکردنی گروپە چەکدارەکانی سەر بەئێرانە لەناوچەکەدا، نەک تەنها لێدان لەتاران.

ئاماژەی بەوەشکردوە، ئەمنییەتی نەتەوەیی هاوپەیمانەکانی ئەمریکاو کەنداوی عەرەبی لەگۆڕەپانەکەدا یەکیگرتوەتەوە بۆ ڕوبەڕوبونەوەی حزبوڵڵاو گروپه‌ عێراقییەکان.

مەترسیی بەردەوامیی هێرشە ئاسمانییەکان بۆسەر عێراق
مۆنقز داغر چاودێری سیاسیی، هۆشداریدەدات له‌وه‌ى، ئەگەری بەرکه‌وتنی عێراق بەهێرشی ئاسمانی نوێ لەپێشوو زیاترە، وه‌كو وتویه‌تى، "عێراق بەبێ ویستی خۆی، بوەتە بەشێک لەململانێیەکی ناوچەیی ئاڵۆز".

هه‌ر له‌و ڕوه‌وه‌، ئالوسی داوا لەزەیدیی دەکات، لەژێر چەتری چوارچێوەی هەماهەنگی بێتە دەرەوەو کۆنفرانسێکی نیشتمانیی فراوان لەگەڵ لایەنە لیبراڵ‌و سەربەخۆکان‌و هه‌رێمى كوردستان ببەستێت بۆ پاراستنی سەقامگیریی وڵات.