زانایان لە لێکۆڵینەوەیەکدا کە ڕۆژی هەینی بڵاویان کردووەتەوە ڕایانگەیاندووە، گۆڕانی کەشوهەوا دەبێتە هۆی گۆڕانکاری لە شێوازی بارانبارین لە سەرانسەری جیهاندا، ئەمەش ڕەنگە ببێتە هۆی بەهێزبوونی زریان و لافاو لەهەندێک ناوچە.
زریانێکی بەهێز لەم هەفتەیەدا تایوان و فلیپین و پاشان چینی گرتەوە و قوتابخانە و کۆمپانیاکان و بازاڕە داراییەکانی داخست و خێرایی با بۆ ٢٢٧ کیلۆمەتر لە کاتژمێرێکدا بەرزبووەوە.
ڕۆژی پێنجشەممە سەدان هەزار کەس لە کەناراوەکانی ڕۆژهەڵاتی چین ناوچەکانیان چۆڵکرد.
زانایان دەڵێن زریانە بەهێزەکانی ناوچە گەرمەکان بەشێکە لە دیاردەیەکی فراوانتر لە ڕووداوە توندەکانی کەشوهەوا کە بەهۆی بەرزبوونەوەی پلەکانی گەرماوە دروست دەبێت.
توێژەران بە سەرۆکایەتی ژانگ وێنکسیا لە ئەکادیمیای زانستی چینی لێکۆڵینەوەیان لە زانیارییە مێژووییەکانی کەشناسی کرد و گەیشتنە ئەو ئەنجامەی کە نزیکەی 75%ی ڕووبەری زەوی جیهان گۆڕانکاری لە بارانبارینی تێدا بەدیکراوە.
توێژەران لە توێژینەوەیەکدا کە لە گۆڤاری “زانست”دا بڵاوکراوەتەوە باسیان لەوە کردووە کە بەرزبوونەوەی پلەکانی گەرما بووەتە هۆی زیادبوونی توانای بەرگەهەوا بۆ ڕاگرتنی شێ، ئەمەش بووەتە هۆی هەڵاوسانی فراوانتر لە بارانباریندا.
ستیڤن شێروود، زانا لە سەنتەری توێژینەوەی گۆڕانی کەشوهەوا لە زانکۆی نیو ساوس وێڵز ئاماژەی بەوەکرد، "ئەمە زیاد دەکات لەگەڵ بەردەوامبوونی گەرمبوونی جیهان، ئەمەش ئەگەری وشکەساڵی یان لافاو زیاد دەکات."
زانایان پێیان وایە گۆڕانی کەشوهەوا شێوازی زریانەکانی ناوچە گەرمەکانیش دەگۆڕێت، ئەمەش وایکردووە کەمتر ڕووبدەن بەڵام بەهێزتر بن.
