شارپرێس:
بەڕێوه‌بەری گشتیی پرۆگرامەکانی خوێندن له‌وه‌زاره‌تى په‌روه‌رده‌ى هه‌رێم ئاشكرایده‌كات، "گۆڕانکاریی گەورە لەپڕۆگرامەکانی خوێندنی ئەمساڵ دەکرێت‌و شارەزایانی خۆمان پاکێجی نوێی خویندن دروستدەکەن".
حەسەن سەرتیپ جاف بەڕێوه‌بەری گشتیی پرۆگرامەکانی خوێندن له‌وه‌زاره‌تى په‌روه‌رده‌ى حكومه‌تى هه‌رێم ئاشكرایكردوه، ''بۆ ساڵی نوێی خوێندنی 2025-2026، لەژێر چاودێریی وەزیری پەروەردەو بەپشتبەستن بەشارەزایانی ناوخۆ، گەورەترین گۆڕانکاریی لەپەرتوکی خوێندنی گشت پۆلەکان کراوە، ئەم گۆڕانکارییەش گرنگە، دور لەهەموو کۆمپانیایەکی دەرەکی‌و سیستەمی وڵاتانی دیکە، بەئەنجامگەیەنراوە".
وتوشیه‌تى، "گۆرانکارییەکە سەرجەم وانەکانی پۆلەکانی 1 تا 12 لەهەموو بەشەکانی خوێندن دەگرێتەوەو تەنها لەبەشی زانستی لەپۆلەکانی 7 تا 12 گۆڕانکارییەکانی دوو وانەی زیندەوەرزانی‌و فیزیا تەواو نەبوەو ئەویش بۆ ساڵی داهاتوو تەواو دەبێت".
به‌وته‌ى به‌رپرسه‌كه‌ى وه‌زاره‌تى په‌روه‌رده‌ى هه‌رێم، "ئەم گۆڕانکارییە قورسە؛ بەهۆی ئەوەی لەکوردستان پەرتوکەکانی خوێندن بەدوو زاراوەو پێنج زمان دەنوسرێن؛ ئەمەش دەبێتە هۆی تێچویەکی زۆر، چونکە دەبێت هەموی بگۆڕدرێت".
بەڕێوەبەری گشتیی پرۆگرامەکانی خوێندن بۆ میدیاى فه‌رمى پارتى قسه‌یكردوه‌و وتویه‌تى، "بەهۆی گرنگیی باخچەی منداڵان، گۆڕانکارییەکانی ئەم قۆناغە ئەمساڵ لە 50 باخچە لەسەرتاسەری هەرێمی کوردستان بەشێوەی ئەزمونی جێبەجێدەکرێت، لەباخچەی ساوایان KG2 ئاستی زیرەکیی منداڵان دیاریدەکرێت بۆ بەرچاوڕونی دایک‌و باوکان".
زیاتر له‌وباره‌یه‌وه جه‌ختیكردوه‌ته‌وه، "خوێندن بەشێوەی ئەلیکترۆنی پەرەی زیاتری پێدەدرێت‌و دایکان‌و باوکان لەڕێگەی بارکۆدەوە دەتوانن لەخوێندنی منداڵەکانیان ئاگاداربن".
