شارپرێس:
به‌گوێره‌ى هه‌واڵێكى میدیاى نزیك له‌پارتى، كۆتایی ئه‌م هه‌فته‌یه نه‌وتى هه‌رێم ڕاده‌ستى كۆمپانیاى به‌بازاڕكردنى نیشتمانى (سۆمۆ) ده‌كرێت، سه‌رچاوه‌یه‌كى وه‌زاره‌تى داراییش وتویه‌تى، "له‌م هه‌فته‌یه‌دا لیستى موچه‌ى مانگى حه‌وت ڕه‌وانه‌ى دارایی عێراق ده‌كرێت".
به‌گوێره‌ى وته‌ى سه‌رچاوه‌یه‌كى وەزارەتی دارایی هەرێم، وه‌زاره‌ته‌كه سەرقاڵی وردبینی کۆتاییە بۆ لیستی موچەی مانگی حەوت‌و هه‌ر لەم هەفتەیەشدا ڕەوانەی وەزارەتی دارایی عێراق دەکرێت.
به‌وته‌ى سه‌رچاوه‌كه‌ى وه‌زاره‌تى دارایی، بۆ لیستی موچەی مانگى حه‌وت ڕەچاوی لێبڕینی 3٪ی خانەنشینی دەکرێت بۆ سه‌رجه‌م فه‌رمانبه‌رانى هه‌رێمى كوردستان.
سه‌رچاوه‌كه باسى له‌وه‌شكردوه، حکومەتی هەرێم هەنگاوە کردەییەکانی بۆ خەرجکردنی موچەی مانگی شەش دەستپێکردوەو هه‌ر لەم هەفتەیەدا نەوت‌و داهاتی نانەوتی بۆ مانگی شەش‌و لیستی موچەی مانگی حەوتیش ڕادەستى به‌غدا ده‌كرێت.
هه‌مان ئه‌و سه‌رچاوه‌یه‌ى وه‌زاره‌تى دارایی زانیاریى ئه‌وه‌شى ئاشكراكردوه، لیستی موچەی مانگی حەوت تەواوبوەو ته‌نها پێداچونەوەی ماوە، سبەینێ یان دوسبەی ڕەوانەی وەزارەتی دارایی عێراق دەکرێت.
جه‌ختیكردوه‌ته‌وه، کۆتایی ئەم هەفتەیە پرۆسەی پێدانی نەوت بەسۆمۆ دەستپێدەکات، هەفتەی داهاتوش حکومەتی هەرێم لەگەڵ بەغدا دەست بەگفتوگۆ دەکات لەبارەی ناردنی موچەی مانگی شەش.
