شارپرێس:
سه‌رۆك وه‌زیرانى عێراق ئاشكرایده‌كات، توانیویانه 29 هەوڵی هێرشی موشەكیی‌و درۆنی گروپە چەكدارەكان، لەخاكی عێراقەوە بۆسەر ئیسرائیل پوچەڵبكەنەوە، هۆشداریشده‌دات‌و ده‌ڵێت:"ڕێگه به‌هیچ كه‌س‌و لایه‌نێك ناده‌ین له‌عێراقه‌وه هێرشبكاته‌سه‌ر هیچ وڵاتێك".
محەمەد شیاع سودانی سەرۆك وەزیرانی عێراق، چاوپێكەوتنێكی لەگەڵ ئاژانسی ئەسۆشییەتدپرێس ئه‌نجامداوه‌و سەبارەت بەنیازی گروپە چەكدارەكانی عێراق بۆ هێرشكردنەسەر سەر ئیسرائیل‌و هەوڵەكانیان بۆ ڕێگریكردن لەو هەنگاوە، زانیاری گرنگى ئاشكراكردوه.
له‌و دیداره‌دا سودانی وتویه‌تى، "زیاتر لە 29 هەوڵی هێرشی موشەكی‌و درۆنیمان لەناو عێراقەوە پوچەڵكردەوە، كە گروپە چەكدارەكان هەوڵیاندەدا بەموشەك‌و درۆن هێرشبكەنەسەر ئیسرائیل، بەتایبەتی لەكاتی جەنگی 12 ڕۆژەی ئێران‌و ئیسرائیلدا".
ده‌شڵێت:"پەرۆشین بۆ ڕێگرتن لەدروستكردنی بیانوو بۆ هەر لایەنێك، كە بیەوێت عێراق بكاتە ئامانج یاخود بۆ ناو جەنگی ڕابكێشێت، بڕیاری جەنگ‌و ئاشتیی، بەدەست دەوڵەتە، نەك كەس‌و لایەنەكان‌و ڕێگەش بەهیچ كەس‌و لایەنێك نادەین عێراق بكاتە سەكۆی هێرشی سەربازیی".
سودانی ئاماژه‌ى به‌سوریا كردوه‌و جه‌ختیكردوه‌ته‌وه، "سوریا وڵاتێكی گرنگە بۆ عێراق‌و پەرۆشین بۆ ئەوەی بەیەكگرتویی بمێنێتەوە".
سودانی له‌باره‌ى هێرشە درۆنییەکانی سەر کێڵگە نەوتییەکانی هەرێمیشه‌وه جه‌ختیكرده‌وه، "ئه‌و هێرشانه کردەییەکی تیرۆریستین‌و حکومەتی فیدراڵ لەگەڵ حکومەتی هەرێم‌و هاوپەیمانیی نێودەوڵەتی کاردەکات بۆ دەستنیشانکردنی ئەو لایەنەی بەرپرسن لەهێرشە درۆنییەکان، بۆ ئەوەی لێپرسینەوەیان لەگەڵدا بکرێت".
سه‌باره‌ت به‌بونی گروپە چەکدارەکانی عێراقیش، سودانی ڕایگه‌یاندوه، "بونی هێزەکانی هاوپەیمانان بوەتە پاساوێک بۆ بونی گروپە عێراقییەکان بۆ ئەوەی خۆیان پڕچەک بکەن، بەڵام هەر کاتێک هێزەکانی هاوپەیمانی نێودەوڵەتی لەعێراق تەواو بکشێنەوە، پێویست ناکات‌و هیچ پاساوێک بۆ هیچ گروپێک نامێنێت بۆ ئەوەی لەدەرەوەی یاساو دامەزراوە فەرمییەکانی ئەمنی چەکیان هەبێت".
