شارپرێس:
سەرۆکی لیژنەی کشتوکاڵ و ئاودرێریی پەرلەمانی عێراق، فالح خەزعەلی، ئاشکرایکردووە کە شاندێکی دانوستانکاری عێراق ژمارەیەک ئاسانکاریی ئابوورییان خستووەتە بەردەم تورکیا، لەوانە زیادکردنی ئاڵوگۆڕی بازرگانی و هاوردەکردنی سووتەمەنیی کارەبا، لە بەرانبەر زیادکردنی بەردانەوەی ئاو بۆ عێراق، بەڵام تورکیا تا ئێستا هیچ وەڵامێکی نەبووە.
خەزعەلی بە ئاژانسی شەفەق نیوزی ڕاگەیاندووە کە "لایەنی تورکی وەڵامی دەستپێشخەرییەکانی عێراقی نەداوەتەوە سەرەڕای بوونی چەندین بنکەی سەربازیی تورکیا لەناو خاکی عێراقدا"، ئاماژەی بەوەشدا کە ئەم پشتگوێخستنە پرسیار  سەبارەت بە جددییەتی ئەنقەرە لە چارەسەرکردنی دۆسیەی ئاو درووست دەکات.
خەزعەلی هۆشدارییداوە لە دەرهاویشتە مەترسیدارەکانی بەردەوامبوونی وشکەساڵی وتویەتی: "مەترسیمان هەیە لە کاریگەریی کەمئاوی لەسەر دۆخی ئەمنیی و هەڕەشەکردن لە ئاشتیی کۆمەڵایەتی، بەتایبەت لە پارێزگاکانی ناوەڕاست و باشوور"، جەختیشی کردۆتەوە کە لایەنی تورکی بەرپرسیارە هەر ڕووداوێک ئەگەر وەڵامی زیادکردنی ئاوی نەداتەوە.
سەرۆکی لیژنەی پەرلەمانییەکە ڕوونیشی کردۆتەوە کە "عێراق پێویستی بە بڕە ئاوێکە کە لە 800 مەتر سێجا لە چرکەیەکدا کەمتر نەبێت، بەڵام ئەوەی لە ئێستادا لەلایەن تورکیاوە بەردەدرێتەوە، لە 350 مەتر سێجا لە چرکەیەکدا تێناپەڕێت، و ڕەنگە بۆ 300 مەتر داببەزێت.
جەختیشی کردۆتەوە کە "بەردەوامبوونی ئەم دۆخە ڕەنگە ببێتە هۆی وەستان و لەکارکەوتنی وێستگەکانی پاڵاوتن (چارەسەرکردن و دابەشکردنی ئاو) لە بەغدا، ئەگەر جوڵەیەک نەکرێت بۆ دابەشکردنی دادپەروەرانەی ئاو.
ئاکۆ عەبدوڵڵا ئاڵی