شارپرێس:
وەزارەتی بەرگری سوریا ئامادەیی خۆی بۆ سەرپەرشتیکردنی کەمپ و بەندینخانەکانی داعش رادەگەیەنێت و دەڵێت،" هێزەکانمان ناچنە ناو گوند و شارۆچکە کوردییەکان ".

وەزارەتی بەرگری سوریا لەڕاگەیەنراوێکدا دەڵێت،" ئامادەیی تەواوی خۆمان رادەگەیەنین بۆ وەرگرتنی کەمپی هۆڵ و تەواوی زیندانەکانی داعش لە ناوچەکەدا، و جەخت دەکەینەوە کە لەپێشینەی کارەکانمان بەرەنگاربوونەوەی داعشە ".

وەزارەتی بەرگری سوریا باسی لەوەشکرد،" رەتیدەکەینەوە دۆسیەی زیندانییەکان وەک بارمتە یان کارتی فشاری سیاسی لەلایەن سەرکردایەتی هەسەدەوە بەکاربهێنرێت بۆ بڵاوکردنەوەی پشێوی و تێکدانی سەقامگیری".

وتیشی،" داوا لە سەرکردایەتی "هەسەدە" دەکەین پابەندبێت بە بەڵێنەکانی و رێککەوتنی 18ـی کانونی دوەم بە شێوەیەکی بەپەلە جێبەجێ بکات ".

وەزارەتی بەرگری سوریا راشیگەیاند،" جەخت لەسەر پابەندیی رەهای خۆمان دەکەینەوە بۆ پاراستنی خەڵکە کوردەکەمان و پاراستنی ئاسایشیان، و دوبارە بەڵێن دەدەین کە هێزەکانمان ناچنە ناو گوند و شارۆچکە کوردییەکان ".