شارپرێس:

دوای بەدواداچونێکی شارپرێس، وەزارەتی ناوخۆی هەرێم رونکردنەوەیەک لەبارەی چۆنیەتی گەیاندنی کۆمەک و هاوکاری بۆ رۆژئاوای کوردستان بڵاودەکاتەوە و دەڵێت، بەڕێوەبەرایەتیەکانی کۆچ و کۆچبەران و وەڵامدانەوەی قەیرانەکان سەرپەرشتی ئەو پرۆسەیە دەکەن، راشیدەگەیەنێت، هیچ کەس و لایەنێک کەلوپەل و کۆمەک نەباتە سنور، لەبەر ئەوەی پێویستی بە رەزامەندی پێشوەختە هەیە.

وەزارەتی ناوخۆی هەرێم لەڕونکردنەوەیەکدا ئاماژەی بەوەکرد،" دوای ئەوەی لە رێکەوتی 22ی کانونی دوەمی 2026، پارێزگا و ئیدارە سەربەخۆکان راسپێردران بۆ سەرپەرشتیکردنی کۆکردنەوەی کۆمەک و هاوکاری مرۆیی بۆ خوشک و برایانمان لە رۆژئاوای کوردستان، بە سوپاسەوە هەڵمەتی گەورە لە هەموو کوردستان دەستیپێکردوە و بڕی زۆر پاڵپشتی و شتومەکی جۆراوجۆر لەلایەن هاونیشتیمانیان کۆکرانەوە و پرۆسەی گەیاندنیان بەشێوەی سەلامەت لەڕوی لۆجستی و ئیدارییەوە دەستیپێکردوە ".

ئەوەشیخستەڕوو،" بەڕێوەبەرایەتیەکانی کۆچ و کۆچبەران و وەڵامدانەوەی قەیرانەکان لەپارێزگاو ئیدارە سەربەخۆکان سەرپەرشتی ئەو پرۆسەیە دەکەن ".

وەزارەتی ناوخۆ داوا لە خیرخوازان دەکات بەردەوام بن لە پێشکەشکردنی دەستی هاوکاری بە هەمان ئەو میکانیزمەی داندراوە و رایدەگەیەنێت،" هیچ کەس و لایەنێک کەلوپەل و کۆمەک نەباتە سنور لەبەر ئەوەی پێویستی بەئامادەکاری و رەزامەندی پێشوەختە هەیە ".

وەزارەتی ناوخۆ باسی لەوەشکرد،" بەڕێوەبەرایەتیەکانی کۆچ و کۆچبەران و وەڵامدانەوەی قەیرانەکان هەموو ئامادەکارییەکان لەروی کۆکردنەوە، رێکخستن و پۆلێنکردنی کەلوپەلەکان و گەیاندن و گواستنەوەیان بۆ رۆژئاوای کوردستان لە ئەستۆدەگرن، سەردانیان بکەن و بەو میکانیزمەی داندراوە کۆمەک و پاڵپشتی بگوازنەوە رۆژئاوا ".

به‌گوێره‌ى به‌دواداچونێكى شارپرێس ده‌ركه‌وت، له‌هه‌ر ناوچه‌و جێگه‌یه‌كى كوردستانه‌وه‌ هاوكاریى بۆ ڕۆژئاواى كوردستان كۆبكرێته‌وه‌، ده‌بێت له‌ڕێگه‌ى ده‌زگاى خێرخوازیى بارزانی‌و به‌لۆگۆى ئه‌و ده‌زگایه‌وه‌ بگه‌یه‌نرێت، سه‌رچاوه‌یه‌كى شارپرێس ده‌ڵێت:"حكومه‌ت ئه‌و هه‌ماهه‌نگیه‌ى له‌گه‌ڵ ڕۆژئاواى كوردستان كردوه‌ كه‌ هه‌ر هاوكارییه‌ك له‌باشور كۆبكرێته‌وه‌، ده‌بێت به‌و شێوازه‌ بگه‌یه‌نرێت".