شارپرێس:

لەکاتێکدا ناوچەکە بەقۆناغێکی هەستیارو پڕ لەگۆڕانکاریی مێژوییدا تێدەپەڕێت، پرسی یەکێتیی نەتەوەیی کورد دەبێتە سەنتەری باسوخواسە سیاسییەکان، دوای ئەوەی زیاتر لە 200 کەسایەتیی دیاری هەر چوار پارچەی کوردستان لەبوارە جیاوازەکاندا پڕۆژەیەکی نیشتمانییان بۆ یەکڕیزیی ڕاگەیاند، کۆنسەی بەڕێوەبەری کۆما جڤاکێن کوردستان (کەجەکە) بەفەرمی وەڵامی بانگەوازەکەی دایەوە.

کەجەکە لەدەستپێکی وەڵامەکەیدا، سڵاوی بۆ جۆش‌و خرۆشی گەل ناردوه‌ کە لەنەورۆزی ئەمساڵدا بەدروشمی (ئازادیی ڕێبەر ئاپۆو یەکێتیی دیموکراتیک) ڕژانە مەیدانەکان، كه‌جه‌كه‌ ئاماژە بەوەدەکات، "ئەم ئیرادە جەماوەرییە سەلماندی کە کورد چیتر قبوڵیناکات بەپەرتەوازەیی بمێنێتەوە".

کەجەکە پڕۆژەی ئەو 200 کەسایەتییە وەک هەوڵێکی زۆر گرنگ‌و واتادار وەسفدەکات‌و ڕایدەگەیەنێت، "ئێمە بەهەموو شێوەیەک پشتگیریی لەم دەستپێشخەرییە دەکەین‌و هەر ئەرک‌و بەرپرسیارێتییەک بکەوێتەسەرشانمان، بەبڕیارێکی گەورەوە جێبەجێیدەکەین".

له‌په‌یامه‌كه‌ى كه‌جه‌كه‌دا هاتوه‌، "سیاسەتی (پەرتکەو زاڵبە)و هێرشە بەردەوامەکانی سەر باشور، ڕۆژئاواو باکوری کوردستان، سەلمێنەری ئەو ڕاستییەن کە ئازادیی هیچ پارچەیەک بەبێ پارچەکانی دیكه‌ گەرەنتی ناکرێت، جەختده‌كه‌ینه‌وه‌، یەکێتیی دیموکراتیک بۆ کورد گرنگییەکی ژیانیی هەیەو بەبێ ئەو، پاشەڕۆژی نەتەوەکەمان لەبەردەم مەترسیی لەناوچوندایە".

كه‌جه‌كه‌ داوا لەتەواوی توێژەکان دەکات، "بەتایبەت ژنان، گەنجان، ڕۆشنبیران‌و هونەرمەندان، کە ببنە بزوێنەری ئەو یەکێتییە، پێویستە ئەم بانگەوازە ببێتە هەنگاوێکی کردەیی‌و کۆتایی بەو قەدەرە ڕەشە بهێنرێت کە بەسەر کورددا سەپێندراوە".

ئەم هەڵوێستەی کەجەکە وەک وەڵامێکی ئەرێنی بۆ کەسایەتییە نیشتمانییەکان، دەرگایەکی نوێ بۆ دیالۆگی ناوخۆیی دەکاتەوەو تۆپەکە دەخاتە گۆڕەپانی لایەنە سیاسییەکانی دیكه‌ تا ئەوانیش هەڵوێستی کردەیی خۆیان بۆ پاراستنی دەستکەوتەکانی گەلی کورد نیشانبدەن.