شارپرێس:
تەڤگەری ئازادیی کورد هۆشداریی توند دەداتە دەوڵەتی تورکیاو ڕایدەگەیەنێت، بەبێ دابینکردنی زەمینەی یاسایی بۆ گەڕانەوەی گەریلاو دیاریکردنی ستاتۆی فەرمی بۆ ئاپۆ، پرۆسەی ئاشتی تەنها ناوەڕۆکێکی بێ ناوەرۆکەو هیچ ئەنجامێکی نابێت.
لەیەکەم ساڵیادی بڕیارە مێژوییەکەی کۆنگرەی 12ی پەکەکە بۆ هەڵوەشاندنەوەی خۆییو کۆتاییهێنان بەخەباتی چەکداریی، بەڕێوەبەرایەتیی تەڤگەری ئاپۆیی لەکۆنگرەیەکی ڕۆژنامەوانیدا لەهەرێمەکانی پاراستنی مەدیا، وردەکاریی ساڵێکی پڕ لەگۆڕانکارییو ئاستەنگەکانی بەردەم پرۆسەی ئاشتییو کۆمەڵگەی دیموکراتیکی خستە ڕوو.
ئیرادەیەک بۆ ئاشتی.. چەک سوتاندنو پاشەکشە
لەکۆنگرەکەدا کە هەریەک لە مستەفا قەرەسوو سۆزدار ئاڤێستا ئامادەیبون، جەخت لەوەکرایەوە، تەڤگەری ئازادی بێ دودڵی بانگەوازە ستراتیژییەکەی ڕێبەر ئاپۆیان جێبەجێکردوە، یەکێک لەکاریگەرترین دیمەنەکانی ئەمساڵە، سوتاندنی چەک بوو لەلایەن بەسێ هۆزاتو 30 گەریلاوە، کە وەک پەیامێکی کردەیی بۆ سەلماندنی نییەتپاکیو ئیرادەی چارەسەری بینرا، هەروەها کشانەوەی هێزە چەکدارەکان بۆ دەرەوەی سنورەکانی تورکیاو چۆڵکردنی هەندێک لەسەنگەرەکان، وەک هەنگاوێکی دیكهى بوێرانە ئاماژەی پێدرا.
بەربەستەکانی بەردەم پرۆسەکە.. بێدەنگیی دەوڵەتو لێدوانە دژبەیەکەکان
سەرەڕای ئەم هەنگاوە ڕادیکاڵانەی تەڤگەرەکە، ڕەخنەی توند لەهەڵوێستی دەوڵەتی تورکیا گیرا، بەڕێوەبەرایەتیی تەڤگەرەکە ئاماژە بەوەدەکات، لەکاتێکدا ئەوان هەنگاوی کردەییان ناوە، وتەبێژانی ئاکەپە بەلێدوانی تەمومژاویو نەرێنی ڕای گشتییان سەرلێشێواو کردوە.
هەروەها جەختکرایەوە، ڕاپۆرتی کۆمسیۆنی پەرلەمان سەرەڕای کەموکوڕییەکانی، هێشتا نەچوهتە بواری جێبەجێکردنەوە، ئەمەش گومان لەسەر دڵسۆزیی دەسەڵات بۆ چارەسەری دروستدەکات.
کلیلەکانى چارەسەری.. ستاتۆی یاساییو مەیدانی ئازاد
تەڤگەری ئازادی لەکۆتایی ڕاگەیەندراوەکەیدا پەیامێکی ڕونی ئاراستەی دەوڵەتو ڕای گشتیی کردو وتى، "ڕێبەر ئاپۆ تەنها دانوستانکارو موخاتەبی سەرەکییە، بۆ ئەوەی پرۆسەکە بگاتە ئەنجام، پێویستە دەوڵەت بەفەرمی دان بەستاتۆی یاساییو سیاسیی ڕێبەر ئاپۆدا بنێتو زەمینەی کارکردنی ئازادی بۆ بڕەخسێنێت، بەبێ ئەم هەنگاوانە، تەنها بەقسەی میدیاییو دیداری کاتی، کێشەی 100 ساڵەی کورد چارەسەرنابێت".
هۆشداریی سەبارەت بەوەهمی چارەسەریی
ههروهك لهقهندیلهوه هۆشداریدەدرێت کە گوتاری بەرپرسانی ئاکەپە (وەک ئەوەی دەڵێن "پرۆسەکە بەردەوامەو کێشە نییە") لەگەڵ ڕاستی ناگونجێت، ههربۆیه ئەم جۆرە قسانە تەنها بۆ خەڵەتاندنی ڕای گشتییە، هۆشداریدەدەین کە بێدەنگی لەئاست هەنگاوە یاساییەکانو مانەوەی ڕێبەر ئاپۆ لەو دۆخەی ئێستایدا، پرۆسەکە بەرەو خنکانو چەقبەستویی دەبات.
هۆشداریی لەسەر پرسی چەکدانان
بەڕاشکاوی لهقهندیلهوه هۆشداریی بهتوركیا درا، "ناکرێت هەنگاوە یاساییەکان بەمەرجی چەک دانانەوە گرێبدرێن، ئەگەر دەوڵەت چاوەڕێبێت سەرەتا چەک دابنرێتو ئینجا یاسا دەربکات، ئەوا پرۆسەکە ناگاتە ئەنجام، زەمینەی یاسایی پێشینەیە بۆ گەڕانەوەی گەریلا، نەک بەپێچەوانەوە".
هۆشداریی سەبارەت بە"ڕۆڵی ڕێبەرایەتی"
ههر لهپهیامهكهى سۆزدار ئاڤێستاو مستهفا قهرهسودا هاتوه، "ڕێبەر ئاپۆ ناتوانێت لەژێر ئەم مەرجە توندانەی ئێستایداو تەنها بەدیداری ناوەبەناوە لەگەڵ شاندەکان ڕۆڵی خۆی وەک دانوستانکار بگێڕێت، بەبێ دیاریکردنی ستاتۆی فەرمیو ئازادیی کارکردن بۆ ئەو، پرۆسەی ئاشتی تەنها ناوێکی بێ ناوەرۆک دەبێت".
فهرمانده دیارهكانى قهندیل هۆشدارییەکی ناڕاستەوخۆیان ڕاگهیاند لهبارهى ئهوهى، ئەگەر دەوڵەت لەسەر ئەم شێوازە بەردەوامبێت، ئەوا دەیسەلمێنێت کە ئیرادەی ڕاستەقینەی بۆ چارەسەری نییە، ئەمەش دەکرێت وەک هۆشدارییەک بێت بۆ ئەوەی کە تەڤگەری ئازادی هەنگاوە یەکلایەنەکانی خۆی (وەک کشانەوەو ئاگربەست) هەڵسەنگاندنەوەی بۆ بکات ئەگەر وەڵامی ئەرێنی وەرنەگرێت.
