شارپرێس:
سه‌رۆك وه‌زیرانی عێراق له‌وتاری ماڵئاوایی كابینه‌كه‌یدا ڕایدەگەیەنێت، حکومەتەکەمان دوای وەرچەرخانێکی سیاسی مەترسیدار کە وڵاتی هەژاندو نزیک بوو لەلێکەوتەی مەترسیدار دروستبوو و سەركەوتنی گەورەشی بەدەستهێنا، لەبارەی هەرێمیشەوە جەختی كردەوە كەدەبێت سیستمی ئەسیكۆدا بەتەواوی جێبەجێبكرێت.

محەمەد شیاع سودانی، سەرۆك وەزیرانی عێراق لەوتارێكدا ڕایگەیاند،" حکومەتەکەمان لە 2ی تشرینی یەکەمی 2022 دەستی بەکارەکانی کرد، ئەمەش دوای وەرچەرخانێکی سیاسی مەترسیدار کە وڵاتی هەژاندو نزیک بوو لەلێکەوتەی مەترسیدار".

سودانی وتیشی،"عێراق توانی له‌ڕێگەی دیپلۆماسی هاوسەنگ و فراوانکردنی بازنەی دەستپێشخەرییە سیاسییەکانیەوە، پێگەی خۆی پێناسە بکاتەوە، هاوکات جەختی لەوه‌ كرده‌وه‌ ناچێته‌ ناو میحوه‌ره‌ ناوچه‌ییه‌كانه‌وه‌. 

لەبارەی دۆخی دارایی عێراقەوە سەرۆك وەزیرانی عێراق ڕاشیگەیاند، وه‌به‌رهێنانی عێراق 114 ملیار دۆلاری تێپه‌ڕاندوه‌".

لەبارەی پڕۆەو بەرزبونەوەی ئاستی بەرهەمهێنان لەبوارە جیاوازەكاندا ئاماژەی بۆ ئەوەكرد، كە له‌كۆی 5300 پرۆژه‌ی په‌ككه‌وتوو، 3250 پرۆژه‌ له‌كاردان، ئاستی به‌رهه‌مهێنانی وزه‌ی كاره‌با به‌رزبوه‌ته‌وه‌و گه‌یشتوه‌ته‌ 29 هه‌زار مێگاوات، ژیان بۆ سه‌دان پرۆژه‌ی ته‌ندروستی گه‌ڕاوه‌ته‌وه‌ كه‌ راوه‌ستابون هه‌روه‌ها خزمه‌ت له‌ 22 نه‌خۆشخانه‌ی نوێ ده‌ستیپێكردوه‌، لەبەرهەمهێنانی گەنمدا گەیشتینە خۆبژێوی، کە لەساڵی 2025 گەیشتە 6.2 ملیۆن تۆن.

سودانی سەبارەت بەبێكاری گەنجان باسیلەوەكرد، لەماوەی سێ ساڵی ڕابردودا رێژەی بێکاری لە 16.5% بۆ 13.5% کەمیکردوە، 963 هەزار خێزانی نوێ بۆ پرۆگرامی پاراستنی کۆمەڵایەتی زیاد کراون، لەماوەی سێ ساڵی ڕابردودا پێوەرەکانی هەژاری لە 25% بۆ نزیکەی 10% دابەزیوە.

سەرۆك وەزیرانی عێراق لەكۆتا وتاریدا باسی لەدۆخی پاڵاوگەكان و بەرهەمهێنانی نەوتیش كردو وتی،" کۆی توانای پاڵاوتنی پاڵاوگەکانی عێراق لە 600 هەزار بەرمیلی رۆژانه‌وه‌ لە ساڵی 2022، بۆ نزیکەی یەک ملیۆن و 200 هەزار بەرمیل لەڕۆژێکدا تا سەرەتای ساڵی 2026 زیادیکردوە.

ئەوەشی ئاشكراكرد، كە عێراق گرێبەستی گەورە لەگەڵ کۆمپانیا نێودەوڵەتییە گەورەکانی وەکو بریتش پترۆلیۆمی بەریتانی، تۆتال، شیڤرۆن، ئێکسۆن مۆبیل، و هالیبێرتۆن واژۆ کردوە.

لەتەوەرێكی دیكەی وتارەكەیدا وتیشی،" سەرژمێری گشتی دانیشتوان بۆ یەکەمجار لەماوەی 38 ساڵدا ئەنجامدرا، کە بنکەیەکی زانیاری گرنگ بۆ هەر پرۆسەیەکی گەشەپێدان یان پلاندانانی دروست دابین دەکات.

پەیامێكیشی بۆ هەرێم ناردو وتی،"ئێمە سیستەمی (ئیسكۆدا)مان جێبەجێ کرد، کە كاركردنی لەدەروازە سنوورییەکان بۆ ئاستێكی بێ پێشینه‌ بەرزکردەوە له‌بواری کۆنترۆڵکردن و ڕێکخستندا و جەختی كردەوە، كەپێویستە لەسەرجەم پارێزگاكان و هەرێمی كوردستانیش بەتەواوی جێبەجێبكرێت.

سودانی لەدرێژەی وتارەكەیدا ئاماژەی بۆ ئەوەكرد، كەمتمانەیان بۆپرۆسەی هەڵبژاردن گەڕاندەوەو وتی،"بەشدارییەکی فراوانی مسۆگەر کردو بەڕێژەی %80 متمانەی بۆ هاوڵاتیان گەڕاندەوە.