شارپرێس:

لەکاتێکدا ڕۆژهەڵاتی ناوەڕاست لەسەر بڵێسەی جەنگێکی ناوچەیی گشتگیر وەستاوە، بەرەی مقاوه‌مه‌ى ئیسلامی لەعێراق لەبەیاننامەیەکی توندو کتوپڕدا، گۆڕانکارییەکی گەورەی لەهاوکێشەی شەڕو ئاشتیدا ڕاگەیاند، گروپە چەکدارەکان بێدەنگیی چەند ڕۆژی ڕابردویان شکاندو شەڕی داهاتوی خۆیان بەتەواوی بەچارەنوسی کۆماری ئیسلامیی ئێرانەوە گرێدا.

حاشاكردن له‌هێرشەکانی ئەمدواییە؛ هێمنی پێش زریان
بەرەی مقاوه‌مه‌ بەفەرمی ڕەتیکردەوە کە لەچەند ڕۆژی ڕابردودا چەکدارەکانیان هیچ هێرشێکی سەربازییان لەدژی بنکەو بەرژەوەندییەکانی ئەمریکا لەعێراق‌و ناوچەکە ئەنجامدابێت، ئەم ڕەتکردنەوەیەش به‌بڕواى چاودێران، وەک پەیامێکی سیاسیی لێکدەدرێتەوە کە دەیسەلمێنێت گروپەکان لەئێستادا ستراتیژییەکی نوێی "چاوەڕوانی‌و چاودێریکردن" پەیڕەو دەکەن، نەک کشانەوە لەمەیدانەکە.

ئێران هێڵی سورە؛ هەڕەشەی شەڕی ڕاستەوخۆو گشتگیر
پەیامە هەرە کاریگەرەکەی بەیاننامەکەى به‌ره‌ى مقاوه‌مه‌، ئاراستەی کۆشکی سپی کراوە، ئه‌و بەرەیه‌ بەڕونی ڕایگەیاندوه‌، "ئەگەر ئەمریکا دەستدرێژییەکانی بۆسەر ئێران فراوانتر بکات، ئێمە بەشێوەیەکی ڕاستەوخۆ دەچینە ناو جەنگەکەوە".

گروپەکان هۆشداریانداوه‌ کە لەحاڵەتی ڕودانی سنوربەزاندنی لەو شێوەیەدا، بەتەواوی هێزو بەبێ هیچ دودڵییەک، سەرجەم بنکە، سەربازگەو بەرژەوەندییەکانی ئەمریکا لەعێراق‌و تەواوی ناوچەکە دەکەنە ئامانجی هێرشە توندەکانیان.

ناوچەکە لەسەر لێواری تەقینەوەدایە
ئەم هەڵوێستە توندەی گروپە عێراقییەکان دوای ئەوەدێت، ناوچەکە لەچەند ڕۆژی ڕابردودا زنجیرەیەک پێکدادانی توندی بەخۆیەوە بینی؛ لەوانە هێرشە موشەکی‌و درۆنییەکانی ئێران بۆسەر پێگەو بەرژەوەندییەکانی ئەمریکا لەوڵاتانی کەنداو، هاوشان لەگەڵ بۆردومانکردنی چەند ناوچەیەکی هەرێمی کوردستان، ئەم دۆخە نیشانیدەدات کە بەرەی مقاوه‌مه‌ى عێراق چیتر جیاوازنییە لەبەرەکانی دیكه‌ى ناوچەکەو هەر هێرشێک بۆسەر تاران، دەبێتە هۆی گڕگرتنی تەواوی عێراق.