شارپرێس:

وابڕیارە ئەمرۆ هەینی لەشاری جەددەی سعودیە کۆبونەوەیەکی سێ قۆڵیی لە نێوان محەمەد بن سەلمان شازادەی جێنشینی سعودیە، ڕەجەب تەیب ئەردۆغان، سەرۆک کۆماری تورکیا و محەمەد شەهباز شەریف، سەرۆک وەزیرانی پاکستان بەڕێوەبجێت.

بەپێی ڕاگەیەندراوی سەرۆکایەتیی کۆماری تورکیا، سەرۆکی ئەو وڵاتە سەردانێکی کاری یەک ڕۆژە بۆ عەرەبستانی سعودیە ئەنجامدەدات و لە چوارچێوەی ئەم سەردانەدا لەگەڵ شازادە محەمەد بن سەلمان و محەمەد شەهباز شەریف کۆدەبێتەوە.

لای خۆشیەوە، سەرۆک وەزیرانی پاکستان ئێوارەی پێنجشەممە گەیشتە شاری جەددە بۆ سەردانێکی فەرمی سێ ڕۆژە، بە هاوڕێیەتی شاندێکی باڵا کە پێکهاتووە لە جێگری سەرۆک وەزیران و محەمەد ئیسحاق دار، وەزیری دەرەوە و عاسف منیر فەرماندەی سوپا و چەندین وەزیری دیکە.

تایبەت بەم سەردانە، تاهیر ئەندڕابی، وتەبێژی وەزارەتی دەرەوەی پاکستان ڕایگەیاندوە، هەرچەندە ئەم سەردانە لە سایەی پەرەسەندنی ئاڵۆزییەکانی ناوچەی کەنداو ئەنجامدەدرێت، بەڵام مانا و ئامانجی زۆر لە قەیرانی ئێستا و تێڕوانینە کورتخایەنەکان گەورەترە.

لە لایەکی ترەوە، وەزارەتی دەرەوەی پاکستان لە ڕاگەیەندراوێکدا ئاماژەی بەوە کردوە کە بەشێکی سەرەکی گفتوگۆکان چڕدەبنەوە سەر بەهێزکردنی پەیوەندییە دوقۆڵییەکان و ئاڵوگۆڕی بیروڕا دەربارەی دواهەمین پێشهاتە هەرێمی و نێودەوڵەتییەکان.

ئاکۆ عەبدوڵڵا ئاڵی