سەرچاوە: ڕۆژنامەی وۆڵ ستریت جۆرنال 

یەکەم: ناوەڕۆکی ستراتیژییکە
بەپێی ئەو زانیارییانەی ڕۆژنامەی وۆڵ ستریت جۆرنال بڵاوی کردووەتەوە، وا دەردەکەوێت ئێران لە شێوازی بەکارهێنانی هێرشە سایبەرییەکاندا ئاراستەیەکی نوێ دەگرێتەبەر. ئەم ئاراستەیە تەنها بە سیخوڕى، بردنى زانیاری و هاککردنی دامەزراوەکان ناوەستێت، بەڵکو هەوڵ دەدات لە ڕێگەی هێرشی ئەلیکترۆنییەوە ئاڵۆزی و زیانی ڕاستەقینە لە ژیانی ڕۆژانە و ژێرخانی ئابووری و خزمەتگوزارییەکاندا دروست بکات.
لە بنەڕەتدا، ئامانج بریتییە لە هێرشکردنە سەر ئەو سیستەمانەی کە بە شێوەی دیجیتاڵی ژێرخانی گرنگی وڵاتان کۆنترۆڵ دەکەن؛ وەک تۆڕەکانی ئاو، کارەبا، وزە، گواستنەوە و کارگە پیشەسازییەکان.
دووەم: نموونەی هێرشەکان
لەڕاپۆرتەکەدا، چەند نموونەیەک لەو جۆرە هێرشانە باس کراون:
1. لە ئەمریکا: هێرشکردنە سەر سیستەمی کۆنترۆڵی دامەزراوەیەکی ئاو، کە کاریگەری لەسەر دەستڕاگەیشتنی بەڕێوەبەران بە پانێڵەکانی کۆنترۆڵ هەبووە.
2. لە ئۆقیانووسی ئەتڵەسی: هاککردنی تۆڕە ئەلیکترۆنییە پەیوەندیدارەکان بە دوو کەشتی گواستنەوەی وزە کە بەرەو ویلایەتی تێکساس دەڕۆیشتن.
3.  لە ئەورووپا: دەستکاریکردنی سیستەمی ساردکەرەوەی فرۆشگاکان لە فەڕەنسا، کە بووەتە هۆی تێکچوونی هەندێک بەرهەمی خۆراکی و ڕوودانی زیانی ماددی. فەڕەنسا هێرشەکەی خستە پاڵ ئێران.
سێیەم: ئامانجە ستراتیژییەکان
ئەم ئاراستە نوێیە دەتوانرێت لە چوار ڕەهەندەوە شیکاری بۆ بکرێت:
فشارخستنە سەر دوژمن : دروستکردنی زیان و ئاڵۆزی بەبێ پێویستی بە ڕووبەڕووبوونەوەی سەربازیی ڕاستەوخۆ.
فراوانکردنی توانای بەرپەرچدانەوە:پیشاندانی ئەوەی کە ژێرخانی هەستیار و دامەزراوە گرنگەکانی دوژمن دەتوانن ببنە ئامانجی هێرشەکان.
شەکەتکردنى ئابووری: زیادکردنی خەرجی پاراستن و چاککردنەوەی ژێرخانی دیجیتاڵی.
جەنگی دەروونی:دروستکردنی هەستی نائارامی و بێمتمانەیی بە ئاسایشی دامەزراوە و خزمەتگوزارییە گشتییەکان.
چوارەم: هەڵسەنگاندنی ستراتیژی
گرنگیی ئەم گۆڕانکارییە لەوەدایە کە جەنگی سایبەری چیتر تەنها ئامرازێک بۆ کۆکردنەوەی زانیاری یان تێکدانی ماڵپەڕەکان نییە، بەڵکو دەتوانێت ببێتە ئامرازێک بۆ دانانى کاریگەریی ڕاستەوخۆ لەسەر ژیانی هاووڵاتیان، ئابووری و ژێرخانی وڵاتان. بۆیە پاراستنی ئاسایشی سایبەری پێویستە لە چوارچێوەی ئاسایشی نیشتمانییدا لێکبدرێتەوە، نەک تەنها وەک بابەتێکی تەکنیکی.
کۆتایی
گۆڕانی شێوازی هێرشە سایبەرییەکان لەلایەن ئێرانەوە، ئاماژەیە بۆ فراوانبوونی چەمکی جەنگ لە ملمڵانێی سەربازیی ئاساییەوە بۆ مەیدانی ژێرخانی دیجیتاڵی و ژیانی ڕۆژانەی هاووڵاتیان. لەم چوارچێوەیەدا، پێویستە ئاسایشی تۆڕەکانی ئاو، کارەبا، وزە، بانک و پەیوەندییەکان بخرێنە ناو پلانی بەرگریی نیشتمانییەوە.