شارپرێس:
بەپێی ڕاپۆرتێکی نوێی شارەزایان، هەڕەشەی گرووپە توندڕەوەکانی سەر بە داعش و قاعیدە و لقەکانیان لە هەندێک ناوچەی ئەفریقا لەوپەڕی توندیدایە، لەگەڵ بەرزبوونەوەی مەترسییەکان لە سوریا، کە هەردوو ڕێکخراوەکە وەک "بنکەیەکی ستراتیژیی بۆ کردەوە دەرەکییەکان" سەیری دەکەن.
ڕاپۆرتەکە، کە پێشکەش بە ئەنجومەنی ئاسایشی نەتەوە یەکگرتووەکان کراوە و ڕۆژی چوارشەممە بڵاوکراوەتەوە، ئاماژەی بەوەکردووە کە گرووپی "نوسرەتولئیسلام و موسلیمین"ی سەر بە قاعیدە لە ڕۆژئاوای ئەفریقا، و بزووتنەوەی شەباب، کە هاوپەیمانی قاعیدەیە لە ڕۆژهەڵاتی ئەفریقا، بەردەوام بوون لە فراوانکردنی ئەو ناوچانەی لە ژێر کۆنترۆڵیان دایە.
شارەزایان، کە چاودێریی سزاکانی سەر هەردوو گرووپەکە دەکەن، ڕوونیانکردۆتەوە کە "گۆڕینی ناوەندی چالاکییەکانی ڕێکخراوەکە بەرەو بەشێک لە ئەفریقا بەردەوام بووە"، بەشێکیشی بەهۆی ئەو زیانانەی کە داعش لە ڕۆژهەڵاتی ناوەڕاست بەهۆی فشاری دژە تیرۆرەوە تووشی بووە. هەروەک وتوشیانە کە "نیگەرانییەکان لەبارەی گەڕانەوەی تیرۆریستانی بیانی بۆ ئاسیای ناوەڕاست و ئەفغانستان بۆ تێکدانی ئاسایشی هەرێمەکە زیاد دەکەن."
شارەزایان ئاماژەیان بەوەکردووە کە داعش هێشتا "دیارترین هەڕەشە"یە بۆ سەر ئەوروپا و ئەمریکا، زۆرجاریش لە ڕێگەی ئەو کەسانەوە کە لە ڕێگەی تۆڕە کۆمەڵایەتییەکان و بەرنامەکانی نامەناردنی کۆدکراوەوە لەلایەن لقی خۆراسانی ڕێکخراوەکە، کە لە ئەفغانستانە، ڕاکێشراون.
لە ویلایەتە یەکگرتووەکانی ئەمریکا، شارەزایان باسیان لەوەکردووە کە چەندین پیلانی تیرۆریستی گومانلێکراو "بە شێوەیەکی بەرچاو بەهۆی ململانێی غەززە و ئیسرائیل" یان لەلایەن ئەو کەسانەوە کە لەلایەن داعشەوە توندڕەو کرابوون، هاندراون.
ڕاپۆرتەکە ئاماژەی بە پیاوێکی ئەمریکی کردووە کە بەیعەتی بە داعش دابوو و لە یەکی کانوونی دووەمدا لە نیو ئۆرلینز بەئۆتۆمبێلەکەی خەڵکی شێلابوو، کە بووە هۆی کوژرانی 14 کەس، کە ئەمە خوێناویترین هێرشە کە لە ساڵی 2016ەوە لە ئەمریکا دەدرێتە پاڵ قاعیدە یان داعش.
لە ناوچەی ساحیلی ئەفریقا، شارەزایان رایانگەیاندووە کە گرووپی تیرۆریستی "نوسرەتولئیسلام و موسلیمین" بازنەی چالاکییەکانی فراوان کردووە و "بە ئازادییەکی ڕێژەیی" لە باکووری مالی و زۆربەی خاکەکانی بورکینافاسۆ کاردەکەن.
 هەروەک چالاکییەکانی داعش لە ناوچەی سەحرای گەورە "بووژانەوەی بەخۆوە بینیوە"، "بەتایبەتی بە درێژایی سنووری نێوان نەیجەر و نەیجیریا، کە ڕێکخراوەکە هەوڵدەدات بوونی خۆی چەسپێنێت".

ئاکۆ عەبدوڵڵا ئاڵی