شارپرێس:

سەرباری بەردەوامی گفتوگۆکانی پڕۆسەی ئاشتی نێوان پەکەکە-تورکیا، لە ڕۆژی سێشەممەی ڕابردوەوە سوپای تورکیا بە بەشداری نزیکەی 250 سەرباز، ئۆپەراسیۆنێکی سەربازی بۆ سەر گوندەکانی دەڤەری گولی لە قەزای باتیفا لە پارێزگای دهۆک دەستپێکرد.

کامەران عوسمان،  ئەندامى رێکخراوى سی پی تى ئەمەریکى ئاماژەی بەوەکرد،" سەرەتا سەربازەکان لە ڕێگەی چەند هەلیکۆپتەرێکەوە لەسەر چیای (سیارا ستەورێ) جێگیرکران و بارەگایەکی سەربازیان لەسەر چیاکە دروستکرد، لە بەرەبەیانی ڕۆژی چوارشەممەشەوە، سەربازەکان دەستیانکرد بە کیوماڵکردنی تەواوی گوندەکانی دەڤەری گولی و هاتن و چونی ناو گوندەکان بە تەواوی قەدەغەکرا.

ئەوەشیخستەڕوو، سەربازەکان لە گوندی (کەشان)ەوە بەرەو گوندی (بانکێ) ڕۆشتن و بازگەی هێزی پاراستنی سنوری عێراقیان تێپەڕاند و دواتر بەرەو گوندەکانی (شلین، شیلانێ، بانکێ، لێهڤانێ، ئەڤلەهێ و پیربلا) بەردەوامیان بە کیوماڵکردنەکەیاندا.

کامەران عوسمان باسی لەوەشکرد، سوپای تورکیا لە ڕۆژی دووشەممە، 28ی تەمموزەوە هەموو ڕێگاکانی گوندی کەشانی بۆ سەر ڕەز و باخ و بێستانی جوتیارەکان داخستوە و تەواوی گوندنشینەکانیش ئاگادار کراونەتەوە کە لە ماڵەکانیان نەیەنە دەرەوە.

ئەو ئەندامەى رێکخراوى سی پی تى ئەمەریکى راشیگەیاند،" سوپای تورکیا مەبەستیەتی لە ڕێگەی ئەم ئۆپەراسیۆنەوە، ڕێگری لە گەڕانەوەی گوندنشینان بۆ سەر گوندەکانی خۆیان بکات و پڕۆژەی دروستکردنی (ناوچەی دابڕ) لە گوندەکانی سەرسنور لە ئیدارەی سەربەخۆی زاخۆ جێبەجێبکات و بەتەواوی هەژمونی سەربازی خۆی لە ناوچەکەدا بسەپێنێت ".