شارپرێس:
دوای ئەوەی لەبەشێک لە میدیاکان دەنگۆی دەستگیرکردنی هەریەک لە حەسەن رۆحانی سەرۆکی پێشوتری ئێران و محەمەد جەواد زەریف وەزیری دەرەوەی پێشوتری ئەو وڵاتە بڵاوکرایەوە، سەرچاوەیەک ئەو دەنگۆیانەی رەتکردەوە.
سەرچاوەیەکی رۆژنامەوانی لەئێران ئاماژەی بەوەکرد،" بڵاوکردنەوەی ئەو دەنگۆیانە لەچوارچێوەی هەڵمەتی چەواشەکاری میدیاییە کە ئامانجیان بڵاوکردنەوەی ترس و دڵەڕاوکێ و دوبەرەکییە لەناو ئێراندا، لەکاتێکدا کە ئەو وڵاتە بە دۆخێکی هەستیاردا تێدەپەڕێت ".
ئەو سەرچاوەیە جەختیشیکردەوە، هیچ رێکارێکی ئەمنی و دادوەری بەرامبەر رۆحانی و زەریفی نەگیراوەتەبەر.
هاوکات، سەرچاوەیەکی دیکەی نزیک لە حەسەن رۆحانی باسی لەوەکرد، نوسینگەی رۆحانی دەیەوێت لە چەند کاتژمێری داهاتودا رونکردنەوەیەک لەبارەی ئەو بابەتەوە بڵاو بکاتەوە.