شارپرێس:

لەکاتێکدا ناوچەکە بەگۆڕانکاریی تونددا تێپەڕ دەبێت، یەکڕیزیی کورد لەڕۆژئاواى كوردستان لەدروشمێکی سیاسییەوە گۆڕاوە بۆ "پرسی مان‌و نەمان"، ئەمڕۆ پاراستنی ئەم یەکگرتوییە تەنها ئەرکێکی حزبی نییە، بەڵکو ستراتیژێکی نەتەوەییە بۆ پوچەڵکردنەوەی ئەو پیلانانەی کە ئاسایشی ناوچەکەو دەستکەوتەکان دەکەنە ئامانج.

قۆناغی ئێستا قۆناغی شه‌رمه‌زاركردنى ئەو دەنگ‌و ڕەفتارانەیە کە دەیانەوێت گومان‌و دوبەرەکی بچێنن، هەر گوتارێک یان سلوکێک کە بۆنی لێکترازان‌و تێکدانی یەکڕیزیی لێبێت، وەک بەشێک لەشەڕی تایبەتی هێزە دەرەکییەکان ئەژماردەکرێت، تێپەڕاندنی ئەم قۆناغەش وه‌كو چاودێران جه‌ختى له‌سه‌ر ده‌كه‌نه‌وه‌، پێویستی بەهۆشیارییەکی جەماوەریی هەیە کە ڕێگە نەدات هیچ ئەجێندایەکی دەرەکی لەژێر پەردەی جیاوازیی سیاسی، یەکڕیزیی نەتەوەیی تێکبدات.

چاودێرانى سیاسیى كورد پێیانوایه‌، ئەزمونە سەختەکان سەلماندیان کە درزی ناوخۆیی، باشترین دیارییە بۆ دوژمنان، یەکڕیزیی ناوخۆیی ئەمڕۆش وەک قەڵغانێکی سەربازیی‌و ئەمنی کاردەکات؛ کاتێک ناوماڵی کورد یەک بێت، توانای ڕوبەڕوبونەوەی هەڕەشە دەرەکییەکان چەند هێندە دەبێت‌و دەبێتە هێزێکی ڕێگر کە ڕێگە لەهەر دەستوەردانێکی سەربازیی یان سیاسیی دەگرێت.

لەهاوکێشە دیپلۆماسییەکاندا، جیهان گوێ بۆ "دەنگی یەکگرتوو" دەگرێت، یەکڕیزیی تەنها بۆ ناوخۆ نییە، بەڵکو کارتێکی بەهێزی فشارە لەسەر مێزی گفتوگۆ نێودەوڵەتییەکان، کورد بەیەکگرتویی دەتوانێت وەک لایەنێکی سەرەکی‌و کاریگەر لەداهاتوی سوریاو ناوچەکەدا مامەڵەی لەگەڵ بکرێت‌و مافە دەستورییەکانی بچەسپێنێت.

كوردانى ڕۆژئاواى كوردستان‌و وه‌كو ڕۆژى سێشه‌ممه‌ش له‌په‌رله‌مانى ئه‌وروپاو كۆنگرێسى ئه‌مریكاوه‌ جه‌ختى له‌سه‌ركراوه‌، ئەو دەستکەوتە سیاسیی، کۆمەڵایەتی‌و ئیدارییانەی لەڕۆژئاواى كوردستان به‌ده‌ستهێنراون، بەرهەمی قوربانییەکی بێوێنەن، له‌و ڕوه‌شه‌وه‌ چاودێران جه‌ختده‌كه‌نه‌وه‌، "هەر هەوڵێک بۆ لاوازکردنی یەکڕیزیی، وەک هێرش بۆسەر ئەو دەستکەوتانە دەبینرێت، پاراستنی ئەو یەکڕیزییەش هێڵی سورەو هیچ سازشێکی لەسەرناکرێت، چونکە تاکە زامنی سەقامگیریی‌و داهاتوی نەوەکانی داهاتوە".

یەکڕیزیی کورد لەڕۆژئاواى كوردستان، ئەمڕۆ چەکە هەرە بەهێزەکەیە؛ چەکێک کە نەک تەنها لەبەرامبەر فیشەک، بەڵکو لەبەرامبەر پیلانە سیاسییە ئاڵۆزەکانیشدا کۆمەڵگە دەپارێزێت، مانەوەش لەم جوگرافیا سەختەدا، تەنها بەیەکگرتویی‌و فەزحکردنی دەنگە تێکدەرەکان مسۆگەردەبێت.