شارپرێس:
وەزارەتی خوێندنی باڵاو توێژینەوەی زانستیی حكومەتی هەرێم، رێکارەکانی خوێندنی بەشێوازی ئۆنلاین و دیجیتاڵی بڵاوکردەوەو ڕایدەگەیەنێت، لەسبەی دوشەممەوە خوێندن لەهەموو زانکۆو پەیمانگەکان دەستپێدەکاتەوە.
 
بەگوێرەی ڕاگەیەندراوەكە، بڕیاردراوە لەڕۆژی دوشەممە 30-03-2026ـەوە، پڕۆسەی خوێندن لەسەرجەم زانکۆو پەیمانگە حکومی و تایبەتەکان بەشێوەی ئۆنلاین دەستپێبکاتەوە. 

بەپێی ڕاگەیەندراوەکە، کۆلێژە پزیشکییەکان جگە لەوانە تیۆرییەکان کە بەئۆنلاین وەریدەگرن، دەتوانن بۆ وانە پراکتیکییەکانیان بچنەوە ناو نەخۆشخانەکان و بەردەوامی بەخوێندن بدەن. 
 
وەزارەتی خوێندنی باڵا ڕاشیگەیاندوە، کە دەبێت وانە ئۆنلاینەکان لەکاتی دەوامی فەرمیدا بن و نابێت بخرێنە شەوان. سەبارەت بەتاقیکردنەوەکانیش، داوا لەزانکۆکان کراوە خشتەیەکی گونجاو دابنێن کەڕەچاوی هاتووچۆی قوتابیانی دەرەوەی شار بکات و قەرەباڵغی لەناو کەمپەس و بەشە ناوخۆییەکاندا دروست نەبێت.
 
لەبارەی خولەکانی پێداگۆجی وەزارەتی خوێندنی باڵا دەڵێت، لەگەڵ سەنتەرەکانی زمان بەشێوەی ئۆنلاین بەردەوام دەبن. گفتوگۆی نامەکانی ماستەرو دکتۆراش تەنیا بەئامادەبونی لیژنەو توێژەر دەبێت و رێگە بەئامادەبونی میوان نادرێت.
 
وەزارەتی خوێندنی باڵا بەڕێوەبەرایەتییەکانی ئایتی لەزانکۆکان ڕاسپاردوە، کە بەردەوام بن لەچارەسەرکردنی گرفتە تەکنیکییەکان و هاوکاریی قوتابیان بکەن بۆ ئەوەی پڕۆسەی خوێندن بەبێ ئاستەنگ بەڕێوەبچێت.