شارپرێس:
وەزارەتی دەرەوەی ئەمریکا سزای بەسەر هەشت کەس و چوار لایەن سەپاند کە بە وتەی خۆی پشتگیری لە بەرنامەکانی فڕۆکەی بێفڕۆکەوان و مووشەکی بالیستیکی ئێران دەکەن، ئەمە جگە لە کۆمپانیای ماهان ئەیر کە لە ئێستاوە لە لیستی سزاکاندایە.
وەزارەتی دەرەوەی ئەمریکا ڕایگەیاندووە، سزاکان هەشت کەس و چوار لایەن دەکاتە ئامانج کە چەندین تۆڕ بەڕێوەدەبەن کە پشتگیری لە بەرنامەکانی فڕۆکەی بێفڕۆکەوان و مووشەکی بالیستیکی ئێران دەکەن، هەروەها کۆمپانیای ماهان ئەیر کە لە ئێستاوە لەژێر سزاکانی ئەمریکادایە.
هەروەها ویلایەتە یەکگرتووەکانی ئەمریکا دوو فڕۆکە وەک موڵکی بلۆککراوی کۆمپانیای ماهان ئەیر دیاری دەکات کە پێشتر ئەندامانی سوپای پاسداران لەگەڵ چەک و کەرەستە و پارەی گواستووەتەوە.
لە بەیاننامەکەی ئەمریکادا هاتووە: ئەم ڕێوشوێنانە بۆ پاڵپشتی "ئۆپەراسیۆنی توڕەیی داستانئامێزە" و جێبەجێکردنی ڕێنماییەکانی دۆناڵد ترەمپە کە ئامانج لێی بەرپەرچدانەوەی بەرنامەکانی چەکی ئێرانە.
ئاماژەی بەوەشکردووە، واشنتۆن بەردەوام دەبێت لە بەکارهێنانی هەموو ئامرازە بەردەستەکان بۆ دۆزینەوە و پەکخستن و بەرپەرچدانەوەی چالاکییەکانی ئێران کە مەترسی دروست دەکەن، بە مەبەستی پاراستنی بەرژەوەندییەکانی ئەمریکا.