شارپرێس:
جی دی ڤانس، جێگری سەرۆکی ئەمریکا  ڕایگەیاند کە ئیدارەی وڵاتەکەی ئەگەری فرۆشتنی فڕۆکەی جەنگی F-35 بە تورکیا تاوتوێ دەکات، ئەمەش لە چوارچێوەی پێداچوونەوەیەکی بەردەوام بە دۆسیەی پەیوەست بە سیستمەکانی بەرگریی ئاسمانیی ڕووسیدا.

بەپێی ڕاپۆرتێکی ڕۆیتەرز، ڤانس ئاماژەی بەوە کردووە کە وەزیری بەرگریی و تیمی هاوڕێی سەرقاڵی لێکۆڵینەوەن لە بابەتەکە، بەڵام پێویستە پێش بڕیاری کۆتایی مەرجە یاساییەکان جێبەجێ بکرێن. 

شایەنی باسە یاسای ئەمریکا ڕێگری لە تورکیا دەکات سیستمی S-400ی ڕووسی لای خۆی بهێڵێتەوە ئەگەر بیەوێت بگەڕێتەوە بۆ بەرنامەی F-35، کە بەهۆی کڕینی ئەو سیستمە لە ساڵی 2019 لە پرۆژەکە دوورخرابووەوە. 

لە ئێستاشدا ئەمریکا و هاوپەیمانەکانی سەرقاڵی هەڵسەنگاندنەوەی هاوکارییە سەربازییەکانی ناوچەکەن.