شارپرێس:

هاوپەیمانی عەزم رایگەیاند، بە وردی چاودێری دوایین پێشهاتەکانی پەیوەست بە دەستگیرکردنی موسەننا سامەرائی دەکەن، داواش لە لایەنە سیاسیەکان و دەزگاکانی راگەیاندن دەکات پێش رێکار و بڕیارەکانی دادگا نەکەون.

هاوپەیمانی عەزم لەڕاگەیەنراوێکدا ئاماژەی بەوەکرد،" بە وردی چاودێری دوایین پێشهاتەکانی تایبەت بە دەستگیرکردنی موسەننا سامەڕائی و ژمارەیەک ئەندام و سەرکردەی هاوپەیمانێتییەکە دەکەین و پێویستە بەپێی دەستور و یاسا مامەڵە لەگەڵ ئەو پرسە بکرێت، بەجۆرێک کە بەشێوەیەکی دادپەروەرانە بێت و مافی هەموو لایەنەکان پارێزراو بێت ".

هاوپەیمانی عەزم دەشڵێت،" بەتەواوەتی رێز لە دادگانی عێراق دەگرین و متمانەمان بە دامودەزگا دەستورییەکانە، پابەندیشین بە هەماهەنگی لەگەڵ لایەنە پەیوەندیدارەکان لەچوارچێوەی یاسا کارپێکراوەکاندا، ئەوەش لەپێناو دەرخستنی راستییەکان و چەسپاندنی دادپەروەری ".

لەکۆتایی پەیامەکەیدا هاوپەیانی عەزم رایگەیاند،" موسەننا سامەڕائی بەدرێژایی مێژۆیی خۆی بە هەڵوێستە نیشتیمانییەکانی ناسراوەو بەردەوام پەرۆش بوە بۆ فەراهەمکردنی لێکتێگەیشتن و هاوبەشییەکان لەنێوان پێکهاتەکانی عێراقدا، هەمیشەش وتارەکانی دابەشبکاری و تایفەگەری رەتکردوەتەوە ".