شارپرێس:
داتای گواستنەوەی کەشتییەکان نیشانی دەدات ژمارەی کەشتییە
تێپەڕیوەکان لە گەرووی هورمز گەیشتۆتە نزمترین ئاست لەماوەی دوو مانگی رابردوودا، دوای
ئەوەی هێرشەکان بۆ سەر کەشتییەکانی گواستنەوەی نەوت لە هەفتەی ڕابردوودا گەیشتنە بەرزترین
ئاست لە سەرەتای شەڕی ئەمریکا و ئیسرائیل دژی ئێرانەوە.
بەپێی داتاکانی کۆمپانیای "کیپلەر" بۆ شیکردنەوەی
داتا، تەنیا 7 کەشتی باربەر ڕۆژی سێشەممە بە گەرووی هورمزدا تێپەڕیون، کە نزمترین ژمارەیە
لە 23ی تەمووزەوە. ئیمانوێل بێلۆستریانو و یۆی تۆریکاتا، شیکەرەوەکانی کیپلەر، لە تێبینییەکی
6ی ئۆکتۆبەر نووسیویانە کە بڕی نەوتی خاوی تێپەڕیوو بە گەرووەکە 27% لە بەرزترین ئاستی
لە ماوەی شەڕەکەدا کەم بۆتەوە و گەیشتۆتە کەمتر لە 10.1 ملیۆن بەرمیل لە ڕۆژێکدا.
ئەوان ئاماژەیان بەوەکردووە کە ئەمە گەڕانەوەیە بۆ
ناوەندی مانگی ئەیلوول، بەڵام تەنیا 74%ی ئاستی پێش شەڕەکەیە. بەگوتەی شیکەرەوەکان،
زۆربەی ئەم کەمبوونەوەیە پەیوەندیی بە گواستنەوەی بار لە تانکەرێکەوە بۆ تانکەرێکی
تر لە کەناری دەریای عومان هەیە، کە بارەکان لەنێوان کەشتییەکاندا دەگوازرێنەوە.
لە بەرامبەردا، هەناردەی نەوت لە کەناری کەناری دەریای
عومان و دەریای سوور گەیشتۆتە 6.7 ملیۆن بەرمیل لە ڕۆژێکدا؛ زیاتر لە دوو هێندەی ئاستی
پێش شەڕ. ئەمەش کەمبوونەوەی دابینکردنی نەوت لە ڕێگەی گەرووی هورمزی تا ڕادەیەکی زۆر
قەرەبوو کردۆتەوە و یارمەیتی داوە کۆی هەناردەی نەوتی خاوی ڕۆژهەڵاتی ناوەڕاست لە نزیک
ئاستی پێش شەڕ بمێنێتەوە.
داتاکان نیشانی دەدەن ژمارەی کەشتییەکان ڕۆژی چوارشەممە
کەمێک زیاد بووە و گەیشتۆتە 10 کەشتیی، بەڵام هێشتا زۆر کەمترە لە ژمارەی ڕۆژانەی زیاتر
لە 20 کەشتی لە ڕۆژانی یەکشەممە و دووشەممە.
بەپێی داتای گرووپی بازاڕەکانی لەندەن، ڕۆژی سێشەممە
8 کەشتی بە گەرووەکەدا تێپەڕیون، کە بە یەکسانی دابەش بوون بەسەر کەشتییە هاتووەکان
و ڕۆیشتووەکان. لەنێوانیاندا 5 کەشتیی گواستنەوەی نەوت و تانکەرێکی گازی سروشتی شلەکراو
بوو کە لە ڕەئس لافانی قەتەر بار کرابوو و بەرەو بەندەری قاسم لە پاکستان دەچوو.
سەرچاوە تایبەتییە ئەمنییە دەریاییەکان دەڵێن هێرشەکان
بۆ سەر کەشتییە تێپەڕیوەکان لە گەرووی هورمز لە هەفتەی ڕابردوودا گەیشتنە بەرزترین
ئاست لە سەرەتای شەڕی ئێرانەوە.
لە نوێترین
ڕووداوەکەدا، دەزگای بازرگانیی دەریایی بەریتانیا ڕۆژی چوارشەممە ڕایگەیاند کە چەند
پڕۆژەیەک کەشتییەکیان لە دووری 51 مایلی دەریایی لە باکووری قەتەر پێکاوە و هەواڵی
برینداربوونی کەسانێکیش بڵاوکراوەتەوە.
پێش دەستپێکردنی شەڕی ئێران لە 28ی شوبات، نزیکەی
125 کەشتیی بازرگانیی گەورە، لەوانە تانکەری نەوت، تانکەری گاز، کەشتیی کەلوپەل و کەشتیی
کۆنتێنەر، بە ڕۆژێکدا بە گەرووی هورمزدا تێپەڕین.
بارەکانی ئەم کەشتییانە پێنجیەکی دابینکردنی جیهانی
نەوتی خاوی و گازی سروشتیی شلەکراویان پێکدەهێنا.
ئاکۆ عەبدوڵڵا ئاڵی