شارپرێس:

به‌گوێره‌ى ڕاپۆرتێكى ئاژانسه‌ فه‌رمیه‌كانى ئێران، هێزى ده‌ریایى ئه‌و وڵاته‌، كه‌شتیه‌كى سه‌ربازیى زه‌به‌لاحى خستوه‌ته‌كارو ئێستا له‌ئاوه‌كانى كه‌نداوى فارس، له‌لایه‌ن هێزى ده‌ریاریى كۆمارى ئیسلامى ئێرانه‌وه‌ سودى لێ ده‌بینرێت.

ئاژانسی هەواڵی مێهرو بەشێك لەمیدیا فه‌رمیه‌كانى ئێران بڵاویانكردوه‌ته‌وه‌، كه‌شتیى سه‌ربازیى زه‌به‌لاحى كوردستان، لەڕێوڕەسمێكداو بەئامادەبونی بەرپرسانی ئێران له‌پارێزگاكانى ڕۆژهه‌ڵاتى كوردستان لەئاوەكانی كەنداوی فارس خراوەتەكارو تایبه‌تمه‌ندیه‌كه‌شى بریتیه‌ له‌وه‌ى، تیمێكى 400 كه‌سى ده‌توانێت هه‌ڵبگرێت‌و خزمەتگوزاری لۆجستی‌و تەندروستی بۆ دابینكراوە.

دەریاوان شەهرام ئێرانی فەرماندەی هێزی دەریایی سوپای ئێران ئاشكرایكردوه‌، ناولێنانی ئەو كه‌شتیه‌ زه‌به‌لاحه‌ له‌سه‌ر پێشنیازی ئه‌و بوه‌.

شه‌هرام بەڕەچەڵەك كورده‌و خەڵكی شارى سنەی ڕۆژهەڵاتی كوردستانە، میدیای ئێرانیش نوسیویانه‌، "بە ئامانجی تۆكمەكردنەوەی یەكگرتویی نەتەوەیی، ئه‌و ناوه‌ له‌و كه‌شتیه‌ نراوه‌و كه‌شتیى زەبەلاحی كوردستان، بەموشەكی ڕاست پێوی سەیاد، تەیاركراوە".

خستنەكاری كەشتیی سه‌ربازیى كوردستان، هاوكات بوو لەگەڵ خستنەكاری كه‌شتیه‌كى دیكەی سەربازیی پێشكەوتوی ئێران بەناوی (سەهەند)، میدیای ئێرانیش نوسیویه‌تى، "ئەو دوو كه‌شتیه‌، چەندین تایبەتمەندی گەورەی سەربازیی لەخۆدەگرن".

بەگوێرەی میدیاكانی ئێران، كه‌شتیى سەهەند ساڵی ڕابردوو لەكاتی چاكردنەوەدا نوقمبوەو دواتر لەئاو ده‌رهێندراوه‌و چاككراوەتەوە، هەروەها باس لەوەشدەكەن، كه‌شتیى كوردستانیش لەڕاستیدا وەك پێگەو بەندەرێكی دەریایی گەڕۆك هەژماردەكرێت‌و چەندین تایبەتمەندی لەخۆ دەگرێت.

شەهرام ئێرانی فەرماندەی هێزی دەریایی ئێران لەبارەی كەشتییەكەوە باسى له‌وه‌كردوه‌، ئەو كەشتییە بەئامرازێكی پشتیوانی بەرفراوانی شەڕ دادەنرێت‌و دەتوانێت چەندین پێداویستی ئۆپەراسیۆن لەبوارەكانی پشتیوانیی، پزیشكی، پەیوەندییەكان، هێلیكۆپتەر، ژێر دەریایی، غەواسی، فریاگوزاری خێراو گەیاندنی خۆراك‌و سوتەمەنی‌و دەرمان دابین بكات".