شارپرێس:

پارتی دیموكراتى كوردستان ڕایده‌گه‌یه‌نێت، "پۆستی سەرۆک کۆمار پشکی ئێمه‌یه‌و هەفتەی داهاتوو لەوبارەیەوە دەست بەگفتوگۆکان دەکەین".

مەحما خەلیل كاندیدى ده‌رچوى پارتى بۆ خولى شه‌شه‌مى په‌رله‌مانى عێراق جەختی لەسەر پێداگریی حزبه‌كه‌ى کرده‌وه‌ بۆ بەدەستهێنانی پۆستی سەرۆک کۆماری عێراق‌و ئاشکرایکردوە، دانوستانە فەرمییەکان لەگەڵ سەرجەم لایەنەکان لەهەفتەی داهاتوەوە دەستپێدەکەن.

خەلیل لەلێدوانێکی ڕۆژنامەوانیدا وتویەتی، "پۆستی سەرۆک کۆمار ئەمجارە بەمافێکی شایستەی پارتی دەزانین، بەپشتبەستن بەئەنجامەکانی هەڵبژاردن". 

ئاماژەی بەوەکردوە، "پێوەرە دیموکراتییەکان لەبارەی دابەشکردنی پۆستەکانەوە ئاماژە بەوەدەکەن کە ئەو لایەنەی زۆرترین دەنگی لەهەڵبژاردنەکاندا بەدەستهێناوە، شایستەی ئەوەیە کە پۆستی سەرۆک کۆمار وەربگرێت".

جەختیشیکردوه‌تەوە، لەبەرئەوەی پارتی لەسەر ئاستی هەرێمی کوردستان‌و عێراق زۆرترین دەنگی کوردی بەدەستهێناوە، ئەم پۆستە بەمافێکی بێ ئەملاو ئەولای خۆی دەزانێت."

لەبەشێکی دیکەی قسەکانیدا، خەلیل باسی لەڕۆڵی داهاتوی پۆستەکە کردوەو ڕایگەیاندوە، پۆستەکە لەخولەکانی پێشودا "کاریگەر نەبوە، بەڵام ئەگەر پارتی بەدەستی بهێنێت، ئەوا دیدێکی ڕونی هەیە بۆ چالاککردنی ڕۆڵی وەک پێگەیەکی سیادیی گرنگ‌و کاریگەر."

لەبارەی دەستپێکردنی گفتوگۆکانەوە، مه‌حما خه‌لیل ئاشکرایکردوه‌، "دانوستانەکانی پارتی بەفەرمی لەهەفتەی داهاتودا لەگەڵ لایەنە کوردیی‌و سونیی‌و شیعییەکان دەستپێدەکەن".