شارپرێس:
وەزیری دەرەوەی عێراق زانیاریى گرنگ له‌باره‌ى ئه‌و گروپه‌ى هێرشیكرده‌سه‌ر كۆرمۆر ئاشكراده‌كات‌و ڕایده‌گه‌یه‌نێت، "ئەو گروپە چەکی گرنگ‌و پێشکەوتوی لەبەردەستەو پێویستە حکومەت ڕێکاریان بەرامبەر بگرێتەبەر".
فوئاد حوسێن وەزیری دەرەوەی عێراق، شەوی ڕابردوو لەچاوپێککەوتنێکی تەلەفزیۆنیدا باسی لەوەکرد، "ڕونە ئەوەی کراوە هێرشەکەی سەر کۆرمۆر کارێکی تیرۆریستییەو هێرشەکەش لەناوخۆدا کراوە، بۆ زانینی بکەرانیشی دەبێت چاوەڕێی ڕاپۆرتی لێکۆڵینەوە بکەین".
وتیشی، "لەڕاپۆرتی هێرشەکانی پێشتردا کە ئێستا لای حکومەتی عێراقە ناوی کەسولایەنە هێرشکارەکە هەیە، بەڵام بەداخەوە حکومەت ڕاپۆرتەکەی بڵاونەکردەوە، پێموایە ئەگەر ڕاپۆرتەکە بڵاوبكرایه‌ته‌وه‌و ڕێکار بگیرایەتەبەر، ئەم هێرشەی دوایی ڕوینەدەداو دوبارە نەدەبوەوە".
سه‌باره‌ت بەو گروپەش کە هێرشەکەی ئەمدواییەی سەر کێڵگەی غازی کۆرمۆری ئەنجامداوە، وەزیری دەرەوەی عێراق ئەوەیخستەڕوو، "لایەنەکە ناسراوەو ئەو لایەنەی هێرشەکەی ئەنجامداوە گروپێکە کە چەکی گرنگ‌و پێشکەوتوی هەیە".
شەوی چوارشەممەی ڕابردوو هێرشکرایەسەر کێڵگەی غازی کۆرمۆر لەسنوری قەزای چەمچەماڵ‌و لەئەنجامدا ئاگرێکی گەورە لەکۆگایەکی غاز کەوتەوە، هێرشەکە هەرچەندە زیانی گیانی نەبوو، بەڵام بەهۆیەوە بەرهەمهێنانی کارەبای هەرێمی کوردستان بەڕێژەی 80% کەمبوەوە.
