شارپرێس:

لەهەنگاوێکی سیاسیی پڕ واتادا، سەرۆکی فەرەنسا ڕاستەوخۆ دێتەسەر هێڵی ئاڵۆزییەکانی سوریاو لەپەیوەندییەکی تەلەفۆنیی هاوکاتدا لەگەڵ جەمسەرە کاریگەرەکان، پەیامی پابەندبون بەڕێککەوتنەکان‌و بەردەوامیی شەڕی داعش ڕادەگەیەنێت.

لەکاتێکدا سوریا لەبەردەم وەرچەرخانێکی مێژویی‌و تاقیکردنەوەیەکی سەختی سەقامگیریدایە، کۆشکی ئەلیزیێ ئاشکرایکرد، ئیمانوێل ماکرۆن سەرۆک کۆماری فەرەنسا، پەیوەندییەکی تەلەفۆنیی گرنگی لەگەڵ هەریەکە لەئەحمەد شەرع سەرۆکی سوریاو ژەنەڕاڵ مەزڵوم عەبدی فەرماندەی گشتیی هێزەکانی سوریای دیموکرات (هەسەدە) ئەنجامداوە.

به‌بڕواى چاودێران، ئەم جوڵەیەی پاریس، تەنها پەیوەندییەکی پرۆتۆکۆڵی نییه‌، بەڵکو وەک چاودێران ئاماژەی بۆ دەکەن، هەوڵێکی فەرەنسییە بۆ چەسپاندنی ڕێککەوتنی کانونی دوەم.

ماکرۆن لەگفتوگۆکەیدا جەختی لەسەر خاڵێکی جەوهەری کردوەتەوە، ئه‌ویش، "پێویستە ڕێککەوتنى كوردو حكومه‌تى دیمه‌شق، وەک خۆیی‌و بەبێ کەموکوڕی جێبەجێبکرێت"، ئەمەش وەک ئاماژەیەک بۆ ڕێگریکردن لەهەر پێکدادانێکی ئەگەریی لەنێوان هێزە نوێیەکانی دیمەشق‌و ئیدارەی خۆسەر لەباکورو ڕۆژهەڵاتی سوریا (ڕۆژئاواى كوردستان) دەبینرێت.

به‌گوێره‌ى بەیاننامەی فەرمیی کۆشکی ئەلیزیێ، تەوەری سەرەکیی گفتوگۆکانی ماکرۆن پرسی "دۆسیەی ئەمنی‌و دژەتیرۆر" بوە، ماکرۆن ڕاشکاوانە بەهەردوو لایەنی ڕاگەیاندوە، فەرەنسا پشتگیریی لەئاگربەست دەکات، بەڵام هاوکات چاوپۆشی لەهیچ سستییەک ناکات لەشەڕی دژی داعش، وتویه‌تى، "هەماهەنگی لەگەڵ فەەنساو هاوپەیمانە نێودەوڵەتییەکان بۆ بنبڕکردنی داعش، مەرجێکی بنەڕەتیی سەقامگیرییە".

مێژوی پەیوەندییەکانی فەرەنسا لەگەڵ ڕۆژئاواى كوردستان‌و پشتگیریکردنی بەردەوامی بۆ هێزە کوردییەکان، وایکردوە پاریس ببێتە گەرەنتییەکی نێودەوڵەتی بۆ جێبەجێکردنی ڕێککەوتنەکان.

چاودێرانیش پێیانوایه‌، ئەو پەیوەندییە تەلەفۆنییە دووپاتکردنەوەی ئەو ڕاستییە بوو کە فەرەنسا نەک تەنها پاڵپشتی ڕۆژئاوا دەکات، بەڵکو دەیەوێت دەسەڵاتی کاتی لەدیمەشق بەسەرۆکایەتی ئەحمەد شەرع، بخاتە بەردەم بەرپرسیارێتییەکی مێژویی بۆ پاراستنی یەکپارچەیی‌و ئاشتیی ناوخۆیی.

ئەم دەستپێشخەرییەی ماکرۆن لەکاتێکدایە کە کۆمەڵگەی نێودەوڵەتی بەوردی چاودێری هەنگاوەکانی شەرع دەکەن بەرەو دیموکراسی‌و شێوازی مامەڵەکردنی لەگەڵ پێکهاتە جیاوازەکان، پرسیارە جەوهەرییەکە لێرەدا ئەوەیە، ئایا لایەنەکان دەتوانن لەژێر چەتری گوشارو پشتگیرییەکانی فەرەنسادا، سوریا لەململانێی ناوخۆییەوە بەرەو قۆناغی بونیادنانەوە ببەن؟.