شارپرێس:

نوسینگەی شاناز ئیبراهیم ئەحمەد سەرجەم ئەو دەنگۆیانە رەتدەکاتەوە کە باس لە هەبونی ناوی لە لیستی گەندەڵکاران و دەرچونی فەرمانی دەستگیرکردنی دەکەن و دەڵێت،" سکاڵای یاسایی لەدژی ئەو دەزگا میدیاییانە تۆمار دەکەن کە ئەو دەنگۆیانە بڵاودەکەنەوە ".

نوسینگەی شاناز ئیبراهیم ئەحمەد، خانمی یەکەمی پێشوی عێراق لەڕونکردنەوەیەکدا ئاماژەی بەوەکرد،" لە دوای هەوڵ و هەنگاوە بەردەوامەکانی حکومەتی عێراق بۆ بەگژداچونەوەی گەندەڵی و دەستگیرکردنی ژمارەیەک کەس بە تۆمەتی دەستدرێژیکردن بۆ سەر ماڵ و سامانی گشتی، نوسینگەی خاتوو شاناز ئیبراهیم ئەحمەد دەستخۆشی و پشتیوانی تەواوی خۆی بۆ هەوڵەکانی سەرۆک وەزیرانی عێراق و دامەزراوە پەیوەندیدارەکان دەردەبڕێت لە پێناو بنبڕکردنی گەندەڵی و بەدیهێنانی دادپەروەری".

ئەوەشیخستەڕوو،" بەڵام بەداخەوە، لە ماوەی ڕابردودا هەندێک کەناڵ، میدیا، پەیجی فەرمی و مۆڵەتپێدراو، جگە لە پەیجەکانی سێبەر، هەواڵ و بابەتێکی بێ بنەما و نادروستیان سەبارەت بە خاتوو شاناز ئیبراهیم ئەحمەد بڵاوکردوەتەوە".

نوسینگەی شاناز ئیبراهیم ئەحمەد دەڵێت،" بۆ هەموو لایەکی ڕوندەکەینەوە کە ئەو هەواڵ و بابەتانە تەنها درۆ و بوختانن و هەوڵێکی بەردەوامن بۆ لێدان لە پێگەی سیاسی و کۆمەڵایەتی شاناز ئیبراهیم ئەحمەد و هیچ بنەمایەکی ڕاستیان نییە".

لەڕونکردنەوەکەدا ئەوەش هاتوە،" لێرەوە ئاگاداری هەموو ئەو کەناڵ، میدیا، پەیجە فەرمی و ئەکاونتە سێبەرانە دەکەینەوە لەکاتی  بڵاوکردنەوەی ئەو جۆرە هەواڵە بێ بنەما و تۆمەتانەدا، ڕاستەوخۆ لە ڕێگەی پارێزەری تایبەتی خاتوو شانازەوە ڕێکاری یاسایی دەگیرێتەبەر و سکاڵای یاسایی لە دژیان تۆمار دەکرێت و  ڕوبەڕوی سزای یاسایی دەکرێنەوە".