شارپرێس:
مەلەفی پەیوەندییەکانی نێوان هەولێرو بەغدا هەنگاوی نوێ بەخۆیەوە دەبینێت، دوای زنجیرەیەک گفتوگۆی چڕ بەسەرپەرشتی ڕاستەوخۆی سەرۆک وەزیرانی هەرێمو هاوتا عێراقییەکەی، پڕۆژەی جێبەجێکردنی سیستمی ئەسیکۆدا گەیشتوەتە قۆناغی کۆتاییو بڕیارە ڕەوانەی ئەنجومەنی وەزیرانی عێراق بکرێت بۆ پەسەندکردن.
دواین کۆسپی بەردەم ئەو ڕێککەوتنە کە پەیوەستبوو بەدابەشکردنی داهاتی خاڵە سنورییەکان، بەگوێرەی دەستورو یاسا بەڕێژەی 50٪ بە 50٪ یەکلاکراوەتەوە، ڕێبهر ئهحمهد وهزیرى ناوخۆى ههرێم پێیوایه، "جێبەجێکردنی ئەم سیستمە، نەک تەنها جوڵەی بازرگانی لەخاڵە سنورییەکان پێشدەخاتو داهاتی هەردولا زیاد دەکات، بەڵکو دەبێتە هۆی هەڵوەشاندنەوەی سەرجەم بازگەکانی نێوان هەرێمو بەغدا، ئەم بازگانەی کە بەوتەی ئهو، "بونیان نایاساییو ناشەرعییەو بەرهەمی هەوڵی تاکەکەسی چەند کەسێک بون لەکابینەکانی پێشودا".
لەڕوی ئابورییو وزەوە، هێشتا سێبەری مەترسییە ئەمنییەکان بەسەر ناوچەکەوە ماوە، بۆ ئهوهش ڕێبەر ئەحمەد وەزیری ناوخۆى هەرێم جەختیکردهوه، "بەهۆی بەردەوامی هەڕەشەکانەوە، بەشێکی زۆر لەکۆمپانیا نەوتییەکان هێشتا ئامادەنین دەست بەکارەکانیان بکەنەوە، هەرێمیش چاوەڕوانی بەڵێنەکانی سەرۆک وەزیرانی عێراقە بۆ دابینکردنی گرەنتی پاراستنی ئەم کۆمپانیایانە".
ئەم پێشهاتانە لەکاتێکدان کە بەگوێرەی ڕێککەوتنی نێوان بەغداو واشنتۆن، لە 30ی مانگی داهاتودا ئەرکی هێزەکانی هاوپەیمانان بۆ ڕوبەڕوبونەوەی داعش لەعێراق بەفەرمی کۆتایی دێت.
بۆ پڕکردنەوەی ئەم بۆشاییەو بەهۆی نەبونی توانای پێویستی عێراق بۆ پاراستنی ئاسمانی هەرێم، ڕێبهر ئهحمهد وتى، "حکومەتی هەرێم لەگەڵ کۆمپانیا نێودەوڵەتییەکان لەگفتوگۆدایە بۆ جێگیرکردنی سیستمی بەرگریی ئاسمانیی، بەتایبەت بۆ پاراستنی کێڵگە نەوتییەکانو کێڵگەی غازی کۆرمۆر. بڕیارە لەچەند ڕۆژی داهاتودا وهفدى هەرێم لەبەغدا لەگەڵ وەزارەتی بەرگریی عێراق کۆببێتەوە بۆ گەیشتن بەبڕیاری کۆتایی لەسەر ئەم پرسە چارەنوسسازە".
