شارپرێس:

وردەکاریی دەنگدانی ڕۆژی دووشەممە لە پەرلەمانی تورکیا نیشان دەدات کە پارتی داد و گەشەپێدان (AKP)، پارتی دیموکراسی و یەکسانیی گەلان (DEM Parti) و پارتی جوڵانەوەی نەتەوەیی (MHP) بە یەکدەنگی پشتگیرییان لە یاساکەی پەیوەندیدار بە پرۆسەی ئاشتی کردووە، لە کاتێکدا پارتی باش (İYİ Parti) بە تەواوی دژی یاساکە بووە.

لە کۆی ٢٧٧ نوێنەری پارتی داد و گەشەپێدان، ٢٦٨ نوێنەر بەشداریی دەنگدانەکەیان کردووە و هەموویان دەنگی بەڵێ یان داوە. هەروەها هەموو ٥٥ نوێنەری ئامادەبووی DEM Parti و ٤٤ نوێنەری MHP دەنگی بەڵێ یان داوە.

پارتی نوێ  (Yeni Parti)، کە لەلایەن ئۆزگور ئۆزەل، سەرۆکی پێشووی حیزبی کۆماریی گەلان (CHP)، دامەزراوە، ٨٩ لە ٩١ نوێنەر بەشداریی دەنگدانەکەیان کردووە. ئەم حیزبە نوێنەرەکانی لە بڕیارداندا ئازاد کردووە و لە کۆتاییدا ٣٥ نوێنەر دەنگی بەڵێ و ٥٤ نوێنەر دەنگی نەخێر یان داوە.

لە پارتی کۆماریی گەلان (CHP)، لە ٣١ نوێنەری ئامادەبوو، ٢٩ نوێنەر لەگەڵ و دوو نوێنەر دژ بوون.

هەروەها هەموو ٢٩ نوێنەری ئامادەبووی حیزبی باش (İYİ Parti) دەنگی نەخێریان بە یاساکە داوە.

لە نێوان ٤٨ نوێنەری حیزبە بچووکەکان و نوێنەرە سەربەخۆکان، ٣٦ دەنگی بەڵێ، دوو دەنگی نەخێر و حەوت دەنگی بێلایەن تۆمار کراوە. سێ نوێنەری پارتی ڕێگای نوێ و چوار نوێنەری پارتی ڕەفاهی نوێ دەنگی بێلایەنیان داوە و سێ نوێنەری تریش بەشداریی دەنگدانەکەیان نەکردووە.

لە کۆی گشتی، ٤٦٧ دەنگی بەڵێ، ٨٧ دەنگی نەخێر و حەوت دەنگی بێلایەن تۆمار کراوە. دوو دەنگیش دووبارە هەژمار کراون و لەبەر ئەوە وەک دەنگی دووبارە دیاریکراون.

بەپێی ئەم ئەنجامانە، زۆرترین پشتگیری بۆ یاساکە لەلایەن پارتی داد و گەشەپێدان، DEM Parti و MHPەوە بووە، لە کاتێکدا زۆرترین دژایەتی بڕیارەکە لەلایەن پارتی نوێ و İYİ Partiەوە کراوە.

یاسای هاوبەشیی نەتەوەیی و یەکپارچەیی کۆمەڵگا
یاسای بەهێزکردنی هاوبەشیی نەتەوەیی و یەکپارچەیی کۆمەڵگا، کە چوارچێوەی یاسایی بۆ پرۆسەی چەک‌دانان و هەڵوەشاندنەوەی PKK دیاری دەکات، دووشەممە دوای زیاتر لە ١٠ کاتژمێر گفتوگۆ و مشتومڕ لە کۆبوونەوەی گشتی پەرلەمانی تورکیا پەسەند کرا.
جێبەجێکردنی هەندێک بەشی ئەم یاسایە پەیوەستە بە پشتڕاستکردنەوەی دامەزراوە ئەمنییەکان لەبارەی کۆتایی هێنان بە چالاکییەکانی PKK و ڕادەستکردنی چەک و تەقەمەنییەکان.
دوای پشتڕاستکردنەوەی ئەنجوومەنی ئاسایشی نیشتیمانی تورکیا (MGK) و بڵاوکردنەوەی بڕیارەکە لە ڕۆژنامەی فەرمیی دەوڵەت، دەرفەت بۆ دواخستنی هەندێک لە دۆسێکان، دادگاییەکان و جێبەجێکردنی حوکمە پەیوەندیدارەکان دروست دەبێت.

DEM Parti   پەسەندکردنی ئەم یاسایەی بە هەنگاوێکی گرنگ لە پرۆسەی ئاشتی و دروستکردنی کۆمەڵگایەکی دیموکراتیک وەسف کردووە.
بەڵام PKK لە بەیاننامەیەکدا ڕایگەیاندووە کە چوارچێوە یاساییە پەسەندکراوەکە کەموکوڕی و هەڵەی زۆری تێدایە.
لە بەرامبەردا، ڕەخنەگران دەڵێن ئەم یاسایە دڵنیایی و گەرەنتیی پێویست بۆ چاکسازییە دیموکراتیکەکان و چارەسەرکردنی سیاسیی کێشەی کورد دابین ناکات.
بەڵام پشتگیریکارانی یاساکە پێیانوایە پەسەندکردنی ئەم چوارچێوەیە یەکەم هەنگاوە بۆ دەرکردنی چەک لە ناو ململا‌نێی سیاسی و فراوانکردنی بوار بۆ چالاکیی سیاسی.