شارپرێس:

وەزارەتی بازرگانیی عێراق ڕایگەیاند، وڵاتەکە هەنگاوێکی ستراتیژیی نوێی دەستپێکردوە بۆ فرەچەشنکردنی سەرچاوەکانی داهات‌و بازاڕەکانی هەناردەکردن، لەو چوارچێوەیەشدا كیشوه‌رى ئەفریقیاو وڵاتانی وەک نەیجیریاو زامبیای وەک هاوبەشی نوێ دەستنیشانکردوە.

محەمەد حەنون وتەبێژی وەزارەتی بازرگانی عێراق لەلێدوانێکی به‌ماڵپه‌ڕێ مه‌داى وتوه‌، "عێراق دەیەوێت پەیوەندییە بازرگانییەکانی لەچەند وڵاتێکی دیاریکراو دەربهێنێت‌و بازاڕی نوێ بۆ کاڵا عێراقییەکان بدۆزێتەوە، ئامانجی ئەم هەنگاوەش تەنها کڕین‌و فرۆشتن نییە، بەڵکو هاندانی کەرتی تایبەتە بۆ چونە ناو بازاڕە گەورەکانی ئەفریقیاو سودوەرگرتن لەکەرەستە خاوەکانی ئەو كیشوه‌ره‌".

به‌گوێره‌ى نەخشە نوێیەکە، عێراق پلانی هەیە کاڵای جۆراوجۆری وەک (خورما، دۆشاو، ئامێری کشتوکاڵی، پەین، چیمەنتۆو بەرهەمی چەرم) ڕەوانەی نەیجیریاو زامبیا بکات، لەبەرامبەردا، بازاڕی عێراق پێویستی بەکەرەستە خاوەکانی ئەو وڵاتانە دەبێت، وەک (کاکاو، قاوە، لاستیک، چەرم، سۆیاو کانزاکان)، کە ئەمانە دەبنە بزوێنەری کارگەکانی ناوخۆی عێراق.

ئەم هەوڵە لەکاتێکدایە کە ئامارەکان مەترسیدارن؛ هەرچەندە هەناردەی عێراق لەساڵی 2025 گەیشتوەتە نزیکەی 90 ملیار دۆلار، بەڵام زۆرینەی هەرەزۆری ئەم بڕە تەنها نەوت بوە، وتەبێژی وەزارەته‌كه‌ش جەختدەکاتەوە، "فرەچەشنکردنی هەناردە" ئامانجێکی بنەڕەتییە بۆ ئەوەی ئابوریی عێراق چیتر بەتەواوی بەستراوەی نرخی نەوت نەبێت.

وەزارەتی بازرگانی سورە لەسەرئەوەی ئەم ڕێککەوتنانە نەبنە "بەڵگەنامەی ناو ڕەفەکان"، بەڵکو بکرێنە پڕۆژەی هاوبەش‌و گواستنەوەی تەکنەلۆژیا، حەنون وتی، "ئێمە نامانەوێت تەنها ژمارەی گریمانەیی دابنێین، بەڵکو دەمانەوێت قۆناغ بەقۆناغ ئاڵوگۆڕی بازرگانیی دەرەکی زیادبکەین‌و کەرتی تایبەت بکەینە جەمسەری سەرەکیی ئەم پەیوەندییانە".

بەوتەی حەنون، لەئێستادا گفتوگۆیەکی چڕ بۆ دیاریکردنی لیستەکان‌و ڕەسمی گومرگی بەردەوامە، تاوەکو دوای واژۆکردنی فەرمیی ڕێککەوتنەکە، عێراق بەفەرمی دەرگای "ئەفریقیا" بەڕوی بەرهەمە نیشتمانییەکانیدا بکاتەوە.