شارپرێس:
بونی بورجی پەیوەندییەکان لەسەر بینایەک لە نزیک ماڵەکەتەوە ڕەنگە ببێتە هۆی دڵەڕاوکێ، بەتایبەت لەگەڵ بڵاوبوونەوەی قسەکردن دەربارەی کاریگەریی شەپۆلە ئەلیکترۆمەگناتیسییەکان لەسەر تەندرووستیی و ئەگەری پەیوەندییان بە شێرپەنجەوە.
بەڵام ئایا نیشتەجێبوون لە نزیک ئەم بورجانە واتا ڕووبەڕووبوونەوە لەگەڵ ئاستی مەترسیداری تیشکدانەوە؟ بەڵگە زانستییە بەردەستەکان ئاماژە بەوە دەکەن لە بارودۆخی ئاساییدا وەڵامەکە بەم شێوەیە نییە، لەگەڵ بەردەوامی توێژەران لە لێکۆڵینەوە لە کاریگەرییە درێژخایەنەکان.
بورجەکانی پەیوەندیی شەپۆلی فرێکوێنسی ڕادیۆیی (RF) بەکاردێنن بۆ ناردن و وەرگرتنی نیشانەکان لە مۆبایلەوە. ئەم شەپۆلانە لە جۆری تیشکدانی نائایۆنکەرن، واتە وزەی پێویستیان نییە بۆ تێکدانی ڕاستەوخۆی ترشی ئەتۆمی (DNA)، بەپێچەوانەی تیشکە ئایۆنکەرەکانی وەک تیشکی ئێکس.
ڕێکخراوی تەندرووستی جیهانی ڕوونیدەکاتەوە کە تاقە کاریگەریی تاقیکراوە لە ئاستی زۆر بەرزدا گەرمبوونی شانەکانی لەشە، لەکاتێکدا ئاستی بەریەککەوتن لە شوێنە گشتییەکانی نزیک بورجەکان زۆر نزمترە لەوە
تا ئێستا هیچ بەڵگەیەکی ڕوون نییە کە بسەلمێنێت بەرکەوتنی ئەم شەپۆلانەی بورجەکان مەترسیی تووشبوون بە شێرپەنجە زیاد دەکات.
کۆمەڵەی شێرپەنجەی ئەمریکی ئاماژە بەوە دەکات بەڵگەکان لەسەر پەیوەندیی نێوان ژیان لە نزیک ئەم بورجانە و شێرپەنجە زۆر سنوردارن، هەروەها توێژینەوەکان لەسەر مرۆڤ هیچ پەیوەندییەکی ڕوونیان لەنێوان مۆبایل و بورجەکان لەگەڵ شێرپەنجە نەدۆزیوەتەوە.
تەوژمی تیشکی ئەنتێنەکان زیاتر بەرەو ئاسۆ ئاڕاستە دەکرێت و وزەکەی بە خێرایی لەگەڵ دوورکەوتنەوە کەم دەبێتەوە، بەمەش ئاستی بەرکەوتن لەسەر زەوی زۆر کەمترە لە سنوورە ڕێگەپێدراوەکان.
ئەمەش واتای ئەوەیە بوونی بورجێک لە نزیکت خۆبەخۆ بەواتای بەرکەوتنی بەرز نایەت، چونکە بەرزایی و ئاڕاستە و هێزی پەخشکردن ڕۆڵی سەرەکی دەگێڕن. ئەنجامی لێکۆڵینەوەکان بۆ تۆڕەکانی پێنجەم 5G هەمان شتە و ئاستی بەرکەوتنیان هاوشێوەی تۆڕەکانی پێشووە.