شارپرێس:

وتەبێژی شاندی دانوستانکاری خۆبەڕێوەبەریی باکور و ڕۆژهەڵاتی سوریا ڕایگەیاند، پێشبینی دەکرێت لە چەند ڕۆژی داهاتودا بڕگەکانی ڕێککەوتنی 10ی ئادار لەگەڵ حکومەتی سوریا بکەونە بواری جێبەجێکردنەوە. 

یاسر سولەیمان، وتەبێژی شاندی دانوستانکاری خۆبەڕێوەبەریی باکور و ڕۆژهەڵاتی سوریا ئاماژەی بەوەکرد، بارودۆخی ئێستای سوریا تەنیا بەرگەی یەک سوپای نیشتمانی دەگرێت، کە پێکهاتەی جۆراوجۆر لەخۆ بگرێت، بۆیە چاوەڕوان دەکرێت لەچەند رۆژی داهاتودا هەسەدە و دیمەشق دەست بەجێبەجێکردنی رێککەوتنەکەیان بکەن.

ئەوەشیخستەڕوو، لایەنی ئەمەریکی وەک سەرپەرشتیار ئامادەی پرۆسەی جێبەجێکردنی ڕێککەوتنەکە دەبێت.

 سەبارەت بە پەیوەندییەکانیان لەگەڵ تورکیا، وتەبێژی شاندی دانوستانکاری خۆبەڕێوەبەریی باکور و ڕۆژهەڵاتی سوریا باسی لەوە کرد، چەندین کێشەی هەڵپەسێردراو لە نێوانیاندا هەیە و خوازیارن لە چوارچێوەی قەوارەی دەوڵەتی نوێی سووریادا چارەسەریان بکەن.