شارپرێس:
بڕیاروایە ئه‌مڕۆ هه‌ینى ستیف ویتکۆف سەردانی غەززە بکات، ئەمەش لەکاتێکدایە بەرپرسێکی ئیسرائیل ئاماژە بەئەگەری فراوانکردنی ئۆپەراسیۆنی سەربازیی لەکەرتی غەززە کرد.
کارۆلین لیڤیت وتەبێژی کۆشکی سپی ڕایگەیاند، ستیڤ ویتکۆیف نوێنەری ئەمریکا ئه‌مڕۆ هەینی سەردانی کەرتی غەززە دەکات‌و له‌نزیكه‌وه سەردانی بنکەی هاریکاری مرۆیی دەکات لەوشاره.
وتەبێژی کۆشکی سپی وتیشی، "بۆ ئەوەی دڵنیاببێتەوە لەوەی برسییەتی لەغەززە ڕونادات‌و کۆبونەوەیەکی گرنگی لەگەڵ بنیامین ناتانیاهۆ سەرۆک وەزیرانی ئیسرائیل‌و بەرپرسانی ئیسرائیل ئەنجامداوە سەبارەت بەگەیاندنی هاوکاری مرۆیی زیاتر بۆ غەززە".
کارۆلین لیڤیت ئاماژەی بەوەکرد، دوای ئەوەی دۆناڵد ترەمپ سەرۆکی ئەمریکا ڕەزامەندیدا، وردەکاری زیاتر لەبارەی پلانی دابەشکردنی خۆراک‌و یارمەتییە مرۆییەکان لەغەززە دەخەینەڕوو.
هەروەها ڕۆژنامەی یەدیعوت ئەحرونۆت-ی ئیسرائیل بڵاویکردەوە، بڕیارە ویتکۆف، لەگەڵ بنیامین ناتانیاهۆ سەرۆک وەزیرانی ئیسرائیل کۆببێتەوە.
ڕۆژنامەکە ڕاشیگەیاندوە، "ویتکۆف، پێشتر لەگەڵ گەورە بەرپرسانی ئیسرائیلدا سەبارەت بەبارودۆخی غەززەو گەیاندنی هاوکارییە مرۆییەکان، گفتوگۆ دەکات".
سەردانەکەی ویتکۆف لەکاتێکدایە، فشاری نێودەوڵەتی بۆسەر ئیسرائیل سەبارەت بەبارودۆخی خراپی خەڵکی غەززەو ڕاوەستانی دانوستانەکان بەمەبەستی گەیشتن بەئاگربەست، زیادیکردوە.
وتەبێژى کۆشکی سپی ئه‌وه‌شى وت:"مایک هاکابی باڵیۆزی ئەمریکا لەئیسرائیل یاوه‌رى ستیڤ ویتکۆف نێردەی تایبەتی ئەمریکا ده‌كات بۆ سه‌ردانه‌كه‌ى غەززە".
ماڵپەڕی ئەکسیۆس بەپشتبەستن بەبەرپرسێکی باڵاى ئیسرائیل ڕایگەیاندوه، بنیامین ناتانیاهۆ لەگەڵ ستیڤ ویتکۆف سەبارەت بەچۆنیەتى ڕێککەوتن لەگەڵ حەماس گفتوگۆیانکردوە کە وردە وردەو بەشبەش هەنگاو بۆ ڕێککەوتنێکی گشتگیر تاووتوێکراوە.
هاوکات ئەوەشخراوەتەڕوو، تەلئەبیب‌و واشنتۆن کاردەکەن بۆ زیادکردنی هاوکارییەکان بۆ غەززە لەکاتێکدا سوپای ئیسرائیل بەردەوامە لەشەڕو ئۆپه‌راسیۆنە سەربازییەکانى.
لەگەڵ واشنتۆن لێکتێگەیشتنێک دەکرێت بۆ ئەوەی بەرەو چوارچێوەیەک بۆ ئازادکردنی هەموو بارمتەکان‌و چەکداماڵینی حەماس هەنگاوبنێن.
دوای ماوەیەکی کەم لەسەردانەکەى ویتکۆف بۆ ڕۆژهەڵاتى ناوەڕاست، دۆناڵد ترەمپ لەتۆڕی کۆمەڵایەتیی خۆیدا پەیامێکى بڵاوکردەوە نوسیویەتى، "خێراترین ڕێگە بۆ کۆتاییهێنان بەقەیرانە مرۆییەکان لەغەززە ئەوەیە، حەماس تەسلیم بێت‌و بارمتەکان ئازادبکات".
ئەمەش لەکاتێکدایە تره‌مپ لەگەڵ سەرکردەکانی فەرەنسا، کەنەداو بەریتانیا ناکۆکە لەسەر دانپێدانان بەدەوڵەتی فەڵەستینی.
