شارپرێس:
سەرەڕای هەڕەشەکانی ئێران بۆ بەئامانجگرتنی تەواوی بنکە سەربازییەکانی ئەمریکا لە وڵاتانی دراوسێ وەک وەڵامێک بۆ دەستدرێژییەکانی ئەمریکا و ئیسرائیل، و جێبەجێکردنی هەڕەشەکانی لە ڕێگەی هێرشکردنە سەر وڵاتانی کەنداو لە بەیانی ڕۆژی شەممەوە، بەڵام وەڵامدانەوەکەی ئێران تورکیای نەگرتەوە. 

 
ئەمە لە کاتێکدایە تورکیا میوانداری بنکەی ئاسمانی "ئەنجەرلیک" دەکات کە یەکێکە لە گەورەترین و گرنگترین بنکە ستراتیژییەکانی ئەمریکا لە ناوچەکەدا و چەکی ستراتیژی تێدایە، جگە لە بنکەی ڕاداری "کوراجیک"، کە هەردووکیان دەکەونە مەودای موشەکە ئێرانییەکانەوە کە گەیشتنە ئیسرائیل و تەنانەت قوبرسیش.

دیارە چەند هۆکارێک هەبوون کە ئێرانیان پاڵناوە بنکەکانی ناو تورکیا نەکاتە ئامانج، گرنگترینیان هەڵوێستی بێلایەنانەی تورکیایە بەرامبەر دۆسیەی ئەتۆمی و هەوڵەکانی ئەنقەرە بۆ دوورخستنەوەی ناوچەکە لە جەنگی نوێ و تێگەیشتنی تورکیا بۆ ئەوەی کە ئیسرائیل هاندەری سەرەکی ئەم شەڕەیە.

لە لایەکی دیکەوە، سوڵتاننشینی عومان کە ڕۆڵی نێوەندگیر و میوانداری دانوستانەکانی کردبوو، بەر هێرشی ئێران کەوت، هەرچەندە ڕۆڵەکەی هاوتای تورکیا یان زیاتریش بوو. پسپۆڕان ئەم پاراستنەی تورکیا دەگەڕێننەوە بۆ ئەندامێتی ئەو وڵاتە لە پەیمانی ناتۆ، چونکە هەر هێرشێک بۆ سەر خاکی تورکیا بە هێرش بۆ سەر هەموو هاوپەیمانییەکە هەژمار دەکرێت و دەبێتە هۆی فراوانبوونی بازنەی جەنگەکە،  هەروەها هێزی سەربازی تورکیا و هاوسەنگیی هێز لە ناوچەکەدا هۆکارێکی دیکەن کە تاران لەبەرچاوی گرتوون.

بولەنت شاهین ئەردێر، نووسەر و پسپۆڕی کاروباری ئێران، ڕایگەیاند کە تورکیا سیاسەتێکی جێگیری هەیە و وەک ئەندامێکی ناتۆ هەوڵ دەدات نێوەندگیری لە نێوان بلۆکی ڕۆژئاوا و ئێراندا بکات و نایەوێت پەیوەندی دوژمنکارانە لەگەڵ دراوسێکەیدا هەبێت.
 ئەو ئاماژەی بەوەش کرد کە تورکیا ڕێگەی نەداوە بنکە و ئاسمانی وڵاتەکەی بۆ هێرشکردنە سەر ئێران بەکاربهێنرێت، و وەڵامدانەوەی تاران تەنها ئەو دەوڵەتانەی گرتەوە کە هاوکاری ئەمریکایان کردووە.

هەروەها ئیسماعیل چۆکتان، نووسەری کاروباری نێودەوڵەتی، ئاماژەی بەوە کرد کە تورکیا سەرەڕای ململانێی 10 ساڵەی لەگەڵ ئێران لە سوریا، بەڵام هەمیشە هەوڵی هێورکردنەوەی دۆخەکەی داوە و ڕایگەیاندووە کە یەکێک لە هۆکارەکانی نەکردنە ئامانجی ئەنجەرلیک ئەوەیە کە ئەمریکییەکان لەم دواییانەدا هێزی زیاتریان بۆ ئەو بنکەیە نەناردووە. 

لە کۆتاییدا، تورکیا لە ڕێگەی رەجەب تەییب ئەردۆغان، سەرۆک کۆمار و هاکان فیدان، وەزیری دەرەوە بەردەوامە لە هەوڵە دیپلۆماسییەکانی بۆ ڕاگرتنی شەڕ، چونکە ئەنقەرە لەوە دەترسێت شەڕەکە زیاتر پەرەبسێنێت و ببێتە هۆی شەپۆلێکی نوێی کۆچبەران کە ئابووری تورکیا توانای لەخۆگرتنیانی نەماوە.