شارپرێس:

دوای سەرکەوتنی یانەی ئامەد سپۆر بەسەر یانەی ئیدسپۆر و سەرکەوتنی یانە کوردییەکە بۆ سوپەرلیگی تورکیا، مبایێ دیاگنێ، هێرشبەرە سەنیگالییەکەی ئامەدسپۆر بە ئاڵای وڵاتەکەیەوە ئاهەنگی گێڕاو پۆلیس بە ئاڵای پەکەکە تێیگەیشتن و ویستیان یاریزانەکە دەستگیر بکەن.

سەرهات ئەرەن، پەرلەمانتاری پارتی یەکسانی و دیموکراسیی گەلان (دەم پارتی) رایگەیاند،"پاسەوانەکانی بەڕێوەبەری پۆلیسی ئیدر ئاڵای سەنیگالیان بینی و وایانزانی ئاڵای پەکەکەیە و ویستیان دیاگنێ دەستگیر بکەن."

ئەو پەرلەمانتارەی دەم پارتی ئەوەشیخستەڕوو،" پۆلیسەکان بە پێداگرییەوە دەیانویست دەست بەسەر ئاڵاکەی سەنیگالدا بگرن، ئێمە چوینە نێوانیان و هەوڵمان دا دۆخەکە بۆ بەڕێوەبەری پۆلیس روون بکەینەوە و پێمانوتن کە ئەمە هێمای پەکەکە نییە، بەڵکو ئاڵای سەنیگالە ".

وتیشی،" دوای گفتوگۆ، دۆخەکە ئارام بوەوەو دواتر، دیاگنێ جارێکی دیکە ئاڵاکەی بەرز کردەوە و درێژەی بە ئاهەنگی سەرکەوتنی یانەکەی بۆ سوپەرلیگ دا."