شارپرێس:

ڕەجەب تەیب ئەردۆغان سەرۆک کۆماری تورکیاو سەرۆکی ئاکپارتی، لەپەیامێکی نوێ‌و تونددا داوای پشتیوانی بۆ پڕۆسەی "ئاشتی‌و کۆمەڵگەی دیموکراتیک" دەکات‌و ڕایدەگەیەنێت، تورکیا خەریکە لەپاشماوەکانی سەردەمی وەسایەت (واتە ئەو سەردەمەی کە سوپاو دادگا بڕیارە گرنگەکانیان دەدا، نەک پەرلەمان‌و خەڵک) ڕزگاری دەبێت‌و بەرەو قۆناغێکی مێژویی هەنگاو دەنێت.

به‌گوێره‌ى ڕاپۆرتە هەواڵییەکان، ئەردۆغان لەوتارێکدا ئاماژەی بەپەسەندکردنی یاسای (بەهێزکردنی هاوپشتی نیشتمانی‌و یەکگرتویی کۆمەڵایەتی) کرد کە لەپەرلەمانی تورکیا بەزۆرینەی 467 دەنگ تێپەڕێنرا، ئەردۆغان ئەم هەنگاوەی بەمێژویی‌و جێگەی متمانە وەسفکرد.

سەرۆک کۆماری تورکیا سوپاسی هەموو ئەو پەرلەمانتارانەی کرد کە دەنگیان بەیاساکە داوەو وتی، "کۆبونەوەی نوێنەرانی جیاوازی کۆمەڵگە لەژێر چەترێکی هاوبەشدا زۆر گرنگە، ئەمە زەمینەی خۆشکردوە بۆ ئەوەی تورکیا لەو کۆت‌و بەندانە ڕزگاربێت کە ساڵانێکی زۆرە ڕێگریی لەپێشکەوتنمان دەگرن، هیچ کێشەیەک لەتورکیادا نییە کە چارەسەرنەکرێت، بەمەرجێک بەرژەوەندیی نیشتمان‌و گەل بخەینە سەروی کێبڕکێیە سیاسییەکانه‌وه‌".

ئەردۆغان لەپەیامێکدا بۆ پاراستنی برایەتی‌و دورکەوتنەوە لەتوندوتیژیی جه‌ختیكرده‌وه‌، "وەرن با ئەو برایەتییەی کە لەمێژودا لەیەک سەنگەردا خوێنمان بۆ ڕشتوە، بەهێزتر بکەین، با تورکیا چیتر باجی قورس نەدات‌و دڵی دایکان بەئازاری نوێ نەسوتێت، داواش لەهەمولایەک ده‌كه‌م زمانێکی نەرم‌و بەرپرسیارانە بەکاربهێنن‌و دوربکەونەوە لەلێدوانی توندڕەوانە کە زیان بەپڕۆسەکە دەگەیەنێت".

ئەردۆغان ڕەخنەی لەهەندێک دەزگای ڕاگەیاندن گرت‌و وتی، "نابێت لەپێناو بەدەستهێنانی بینەرو لایکی زیاتر، بابەتێکی ئاوا چارەنوسساز بشێوێنرێت"، هۆشدارییشدا ئەو حزبانەی کە بە حیسابی کورتخایەن مامەڵە دەکەن، داوای لێکردن ئیرادەی پەرلەمان (ئەو 467 دەنگە) بەباشی بخوێننەوە.

لەکۆتاییدا ئەردۆغان هەڕەشەیەکی مێژویی ئاراستەی نەیارانی ئەم قۆناغە نوێیە کردو ڕایگەیاند، "هەرکەسێک لەبەرامبەر ئەم پڕۆسەیەدا بوەستێتەوە، لەبەردەم مێژودا بەبەرپرسیار دەمێنێتەوە".

ئەم لێدوانانەی ئەردۆغان لەکاتێکدایە، باس‌و خواسەکان لەسەر پڕۆسەیەکی نوێی ئاشتی لەتورکیا لەگەڵ لایەنە کوردییەکان‌و لایەنە ئۆپۆزسیۆنەکان گەرم بوەو حکومەت دەیەوێت لەڕێگەی یاسای نوێوە پێگەی خۆی بۆ ئەم هەنگاوانە بەهێز بکات.