شارپرێس:
دوای بڵاوبونەوەی فەرمانی دادگای سەربازیی سەبارەت بەهه‌وڵدان بۆ گەڕاندنەوەی زیاتر لەملیارێک‌و 400 ملیۆن دینار، لیوا چەتۆ ساڵح بریکاری وەزارەتی ناوخۆ بەتوندی وەڵامدەداتەوەو پڕۆسەکە بەبوختان‌و هەڵمەتێکی چەواشەکاریی وەسفدەکات‌و له‌ڕێگه‌ى ئه‌م ڕونكردنه‌وه‌یه‌شه‌وه بریکار جه‌ختیكردوه‌ته‌وه، "من ده‌ستگیرنه‌كراوم".
پرسى دیارنه‌مانى سێ ملیار دیناری ناو یەکەی پاسەوانییەکانی وەزارەتی ناوخۆی هەرێمی کوردستان، بەرەو گرژیی‌و ڕوبەڕوبونەوەی توندی ڕاگەیاندن هەنگاو دەنێت، لەدوایین پێشهاتدا، لیوا چەتۆ ساڵح بریکاری وەزارەتی ناوخۆ ڕونکردنەوەیەکی توندی بۆ ڕای گشتیی بڵاوکردەوەو تێیدا هێرشیکردەسەر ماڵپەڕو پەیجە فەرمی‌و سێبەرەکانیش.
بریکار جەختیکردوەتەوە، "هەڵمەتێکی ناڕەواو ناڕاست لەدژی من بەڕێوەدەچێت‌و ئەو بوختانانەی باس لەدەستبەسەرکردنم لەشاری سلێمانی دەکەن، سەرلەبەری چەواشەکارییەو هیچ بنەمایەکی ڕاستییان نییە".
سەبارەت بەو بەڵگەنامەیەی دادگای سەربازی کە داوای ئامادەبونی دەکات، لیوا چەتۆ ساڵح لەڕونکردنەوەکەیدا نوسیویەتی، "سەبارەت بەو وەرەقەیەی دادگای سەربازیش، دادگای ناوبراو سەر بەوەزارەتی ناوخۆیەو داواکردنی کەسانی پلە باڵا شێوازو ڕێکاری یاسایی‌و ڕەزامەندی مەرجەعی ده‌وێت نەک له‌ڕێگه‌ی سۆشیال میدیاو چەواشەکاریه‌وه".
ڕونكردنه‌وه‌كه‌ى بریکاری وەزارەتی ناوخۆ بۆسەر دەزگاکانی ڕاگەیاندن لەکاتێکدایە، ده‌زگاى میدیایى شارپرێس لەکاتی بڵاوکردنەوەی هەواڵە بنەڕەتییەکەدا، بەهیچ شێوەیەک باسی لەدەستگیرکردن یان بەندکردنی خودی بریکار نەکردبوو، لەهەواڵەکەدا بەڕونی وردەکاریی، ڕێکەوت‌و دەقی ژمارەی نوسراوە فەرمییەکەی دادگای سەربازی (ژمارە 2283ى لەڕۆژی 16ی 9ی 2026) خرابوەڕوو کە تێیدا هاتوە نووسراوەکە ئاڕاستەی وەزیری ناوخۆ کراوە تا لەو ڕێگەیەوە بەشێوازێکی فەرمی بریکار ئاگادار بکرێتەوە بۆ ئامادەبونی لەبەردەم دادگا.
هه‌روه‌ك ڕونكردنه‌وه‌و هێرشه‌كه‌ى لیوا چەتۆ ساڵح بۆسه‌ر میدیاكان له‌كاتێكدایه، ئه‌مڕۆ نوسینگەی فەرمیی خودی بریکار پێشوەختە قسەی بۆ شارپرێس کردبوو و ڕونکردنەوەکەیان لەناو دەقی هەواڵەکەدا وەک پێوەرێکی هاوسەنگی جێگیرکرابوو.
