شارپرێس:

بەڕێوەبەرایەتی کەشناسی هەرێم پێشبینی دەکات لەرۆژی پێنجشەممەی ئەم هەفتەیەوە شەپۆلێکی بارانبارین روو لەسەرجەم ناوچەکانی هەرێمی کوردستان بکات و تاکو رۆژی شەممە بەردەوام بێت.

بەڕێوەبەرایەتی کەشناسی و بومەلەرزەزانی هەرێم لەڕاگەیەنراوێکدا ئاماژەی بەوەکرد،" بەهۆی نزمە پاڵەپەستۆی دەریای ناوەڕاست بۆ سەر ناوچەکەمان، لەکاتەکانی بەیانی ڕۆژی پێنجشەممە، ڕێکەوتی 29-10-2026 ناوچەکەمان دەکەویتە ژێر کاریگەری شەپۆلێکی بارانبارین و هەورە تریشقەشی لەگەڵدا دەبێت "     .

ئەوەشیخستەڕوو،" کاریگەری ئەم شەپۆلە تاکو ڕۆژی شەممە، ڕێکەوتی 31-10-2026 لەسەر ناوچەکەمان بەردەوام دەبێت، لەم ماوەیەدا بارانبارین بەشێوەی بارانی مامناوەند و هەندێ کات لێزمەباران و هەورە تریشقەش دەبێت".

کەشناسی هەرێم دەشڵێت،" لەگەڵ دەستپێکردنی کاریگەری نزمە پاڵەپەستۆی دەریای ناوەڕاست، کاریگەری نزمە پاڵەپەستۆی دەریای  سوریش درێژ دەبێتەوە بۆ سەر ناوچەکەمان، پلەکانی گەرما بە نزیکەی (3-5) پلەی سیلیزی نزم دەبێتەوە، خێرای با بۆ ڕۆژی هەینی زیاد دەکات بۆ سەروی 25 کیلۆمەتر لە کاتژمێرێکدا ".

بەپێی پێشبینییەکان، ڕۆژی شەممە 31-10-2026  شەپۆڵی بارانبارین لەسەر ناوچەکەمان کۆتای دێت .


بڕی بارانبارینی پێشبینیکراو لە ماوەی کاریگەری ئەم شەپۆڵەدا بەمشێوەیە دەبێی:

-سەنتەری پارێزگاکان لە سەروی 12 ملم دەبێت

-سەنتەری ئیدارە سەربەخۆکانی (ڕانیە زاخۆ سۆران)  سەروی 15 ملم دەبێت

-سەنتەری ئبدارەی گەرمیان لە سەروی 8 ملم دەبێت

-ناوچە شاخاوییە بەرزەکان و سنورییەکان سەروی 20 ملم دەبێت .

-هەندێ کات ئەگەری بەرزبونەوەی ئاستی ئاو هەیە لەکاتی بارانبارینی بە لێزمە .